Phet seng 8ngut ki heh NPP

Bah RM Shabong

Ban da shu ia pynksan ruh, ka iahap bad lada pynrem ruh ka ia biang hi, hynrei ka jing phet seng jong ki phra ngut ki riew rangbah na ka seng NPP na Jaintia hills, ka la dei ban pynkyndit ia ki nong ialam jong katei ka seng, ba ka don pleng ka jing bym hun ia ka trei ka ktah bad ka kam ka beng jongki.

Ki phra ngut ki nong ialam, kiba la mih na ka seng NPP, ki dei ki briew kiba la heh la san bad kiba la mad ia ka ja mluh ne ka ja doh, lyngba u dewiong bad ha kane ka kynti, ki don ia ka daw ban pyrshah jur ia ka jingleit kit dewiong na Assam, ban bsa sha ki karkhana dewbilat, haba u dewiong u don byllai bah bad ula shu sahkut mynta la 5 snem tam bad ba ym lah shuh ban ia die ia thied, lane lada buh ha kawei ka kyntien, ka pyni ba ia u dewiong lajong, ym lah ban die bad uba nabar pat u iaid iew thik thik bad kumta kiba pli, ki la hap ban shu ia peit jawdud.

Ngim tip, mano ba wan rah ia kane ka buit sianti kaba kham khyllah ha kane ka kynti, ha kaba kum kane ka saw ka sian; ha ka jingshisha, ka la dei ka kamram jong ka sorkar Jylla, ba kan leit sha ka NGP, ka Supreme Court lane sha kino kino ki bor, ban iakren ba dei ban ailad noh ban ia die ia thied ia u dewiong uba don ha ka Jylla, ha kaba kum kane ka hiran jong ki paidbah, hynrei kaba lyngngoh ka long ba ia kane ka mat, ngi shu ia sngap man man bad mynta, ngi thaw lad ban khang lad ia ki trai jylla bad ban ailad ia kiba nabar.

Mynta ka la iaid ar snem shiteng, ha ka jing treikam jong kane ka sorkar NPP, hynrei na kaei kaba paw, ngi iohi, ba ka jing kular jongka, ban pyllait dew iong, kam pat poi satia shaei shaei ruh bad ha ka kum kane ka hiran pyrthei, lada kam lah ban plie wang ia katei ka khyrdop jong ka khaii pateng, kumta kan long ka jingtim ia u paidlang ka Jylla hi baroh kawei bad nangta kan long ruh ka jingtim kaba shyrkhei ia ki nongialam jong kane ka sorkar synrop, ha kaba ki la shu thok bad shukor ia u paidlang ka Jylla, da ka jingpnah thylliej jongki.

Ngin dang ia peit ia kaba shakhmat, hynrei mynta lah jan lai bnai, ki jingtrei kam jong kane ka sorkar, ki la sangeh lut bad shu iohi, ba ki kam ki iaid tang ha ka twitter bad ka facebook account jong khyndiat ngut ki heh sorkar bad ha katei ka dur, ka jingma kaba eh than ka ap ia u duk u raitoi jong ka Jylla hi baroh kawei.