“Ynda wan u Sohan na Bangladesh, un pynhiar kput ia ki pulit” Ngin ia um snam namar ka Garo land: GNLA

Shillong,15 Nailur:
Ka seng lehnoh ka Garo National Liberation Army (GNLA) ka la ai ksai ba u nongialam radbah jong ka uba dei u Commander-In-Chief u Sohan D. Shira shen, un sa wanphai na Bangladesh , bad ka jingwan phai jong u kan long ka kput kaba shykhei ia ki pulit ka jylla. Ha ka kyrwoh kaba u nongialam katei ka seng u la pyllait paidbah ha kaba ia dei bad u Sohan u la ong ba u Sohan u la phah ktien bad u la ong “Ngan ym iehnoh ia ka seng jong nga na ka jingiakhun, bad ka jingwan phai jong nga kan dei ka kput kaba jur ia ki pulit jylla. Ka Garo Land ka dei ka thong jong ngi bad lada donkam baroh ma ngi ka GNLA ngin jaw snam na bynta jong ka”, ong ka jingthoh kaba la pyllait da u Savio. U Savio haba pyllait khubor ha ka kyrteng jong u Sohan u la ong ba ka jingleit jong u Sohan sha ki thain ka Bangladesh ka dei ka jingleit ia kynduh bad kiwei pat ki Ri kiba ka GNLA ka don jing iadei kam, U la ong , “Ka kam jong ngi ka dei ka jingiakhun Garoland bad ha ka jingiakhun donkam ia ki tiar ialeh kiba biang na ka bynta ka ban sa wan kaba ia kitei ki tiar ialeh yn pynbit pynbiang da ki ri kiba na shabar, ka dei tang ka jingpyrkhat jong ki pulit ba nga leit phet rieh sha Bangladesh” ong ka jingthoh kaba la pyllait sha ki lad khubor Ka GNLA lyngba u Savio ka la kyntait ia ka khubor jong ki pulit bad ka la kam ba ki khubor pulit ki dei kiba lamler.
Ka GNLA ka la ong ba ka jingdawa Garoland ka lah ban long tang ka jingphohsniew bad ka khana biria sha kiba bun, hynrei u la ong ba ha ka GNLA ka dei ka thong bad ka jingangnud kaba khraw kab ala pynduh noh ia ka jingtieng jingkyiuh jong ki bad ki kloi ban ia khun pyrshah ia ki bor ia leh jong ka sorkar, “Ngi ngeit ba ngin ioh beit ia ka Garoland bad ngi tip kaei kaba donkam ban pynshitrhem ia ka jingiakhun haduh ban poi sha ka thong” ong biang ka kyrwoh.
Ka GNLA ka la kynthah kylla ruh halor ka jingbuddien ki pulit ia u Sohan bad ha ka juh ka por ka la kylli balei kim shym la lah ban buddien ia u Nurul Islam haduh kine ki sngi. U Islam u dei u pulit jylla u ba la shah kem namar ki jingdonkti jong u ban batbor ia ar ngut ki khynnah kynthei hynrei u la ioh phet krad na along pulit ha u jylliew jong u snem ba la dep. La kynnoh ba u la batbor ia kawei ka khynnah kaba dang 14 snem karta hapoh Ampati PS ha ka 13 tarik u lber, kham hadien ha ka 31 tarik u lber u la batbor ia ka hynmen jong ka kaba 17 snem karta da kaba pynap suloi ha ing sah jong ki.