Pyniar ka HFU ia ka kam ban pynpoi ia ki jhur Khasi ha man ki tyngkong iing

Shillong: Ka seng nongrep hapoh ka shatri jong ka Hill Farmers Union (HFU), ka la rai ban nang trei shitom shuh shuh na ka bynta ki nongrep da kaba pyniar ia ka jingshakri ban pynpoi jhur khasi sha ki tyngkong iing (Home Delivery) hangne ha ka Nongbah Shillong.

Haba iakren bad u bah Commander Shangpliang President jong ka HFU, u la iathuh ba ha kine ki shibnai ba la dep ka seng ka la trei shitom ban iarap ia ki dkhot ka seng bad ki nongrep ka jylla hi baroh kawei ban pynpoi ia ki mar rep na ki jaka rep beit beit sha ki nongbam ha ka Nongbah Shillong da kaba die ha ki nongdie (retail shop) bad kumjuh ruh da kaba pynpoi sha ki nongbam lyngba ka project “Beit beit na lyngbkha sha ki Nongbam”.

U la iathuh ba ka seng ka iakynduh jingeh ban die bad ban pyniaid iew ia ki jhur khasi ha ka Nongbah Shillong namar ka jingjyllei jong ki jhur dkhar bad ki nongbam ruh kim tip satia ban pyniapher ia ki jhur khasi bad ki jhur dkhar, kumta ka seng ka la rai ban kham pyniar shuh shuh ia ka kam ban leit ai beit beit sha ki iing ki sem khnang ba ki paidbah kin lah ban ioh ia ki jhur khasi bap aka kiba lah ban shanniah.

U bah Commander Shangpliang u la iathuh ba ha kine ki khyndiat sngi ka seng ka la lah ban iarap ban pyndie ia ki mar jong ki nongrep da ki spah ton kynthup u kajor, motor, sohmynken jhur, sohkhia, phansaw, pudina, muli, kubi, phrisbin, dhonia, salad, tyrso, sla beet, u beet, sla phul, jamyrdoh, jaud, jyllang, jatira, ka koit, strawberry bad kiwei kiwei ki jhur khasi.

Na ka bynta ka home delivery ki paidbah kiba kwah jhur ki lah ban phone ha u number 8837287374/8974071503. Ha ka juh ka por u bah Commander Shangpliang u la kyntu ia ki paidbah ka jylla ba kin iarap ia ki nongrep ka jylla bam bam da u jhur khasi namar kumba ka long mynta ka seng ka shem jingeh ban pyniaid iew ia ki mar kiba la mih byllai mynta.

Ka seng ka pan ruh ia ka jingiatreilang na ki Dorbar Shnong, ki nongkhaii bad ki paidbah ka jylla baroh kawei ban kyntiew ia ki nongrep ka jylla da kaba die, thied bad bama ia ki jhur trai Ri. Ka seng ka kyntu ruh ia ka sorkar ban kyrshan ia ki nongrep lyngba ki project bapher bapher.