KA BALANG RYMPEI

Julius Nongdhar

Ka kyntien ‘Balang Rympei’ ka thew ia ka longiing longsem, ka kynhun kaba rit tam jong ka jingialumlang ki riewngeit u Khrist. Wat la ngi dang shu iohsngew shen, kane ka kyntien ka la don naduh ka spahsnem banyngkong. Ka ktien Greek ‘ecclesiola’ ka thew ia ka ‘balang barit’. “Ka Dorbarbah Vatican II da kaba pyndonkam ia kane ka ktien, ka niewkor ia ka longiing longsem kum ka Ecclesia domestica ne Balang Rympei” (CCC No. 1656) namar dei hangne ba ngi tip nyngkong ia u Blei.

Ka longing longsem bad ka jingialap ia ka Gospel katkum ka jinghikai jong ka Balang:
Naduh ka Dorbarbah Vatican II, bad khamtam eh ha ka por jong ka jinglong Kpa Bakhuid jong u John Paul II Bd., ka la shai bha kdar ba ka longiing longsem ka dei ka “ka rukom long jong ka Balang”. Kane ka mut ba ka longiing ka longsem ka dei ka thong jong ka jingialap ka Balang ia ka Gospel.

Ka Dorbarbah Vatican II ha ka dulir Lumen Gentium No. 11 ka ong kumne “Na ka shongkha shongman jong ki Khristan la pynlong ia ki longiing longsem. Hangne la kha ia ki nongshongshnong jong ka imlang sahlang bad da ka jingaiei jong u Mynsiem Bakhuid lyngba ka Baptisma la pynlong ia ki ki khun jong u Blei. Ha rympei iing, ia kaba la niewkor kum ka ‘Balang Rympei’, ki kmie ki kpa ki long ki nongialap banyngkong shaphang ka jingngeit ha ki khun ki kti da ka ktien bad ka nuksa.” Da kaba leh kumta, ki kmie ki kpa ki pynlong ia ka longiing longsem ka kynhun jong kiba ngeit kiba la shah khot sha ka jinglongkhuid longkyntang (cf. 1 Pet. 1:15) lyngba ka jingialap ia ka Gospel bad pathai ia ka jingaiei jingblei jong ka jingieid lyngba ki jingleh jingkam ba man la ka sngi ka jong ki.

U John Paul II Bd. u la thoh ha ka Shithi Kyntu jong u, ka Familiaris Consortio kumne, “Ka iing ka sem ka don ia ka mission ban iada, ban pynpaw bad ban pathai ia ka jingieid”. Kane ka mission ka don hapdeng duh jong “ka jingiasnohlang jong ka jingim bad jingieid” kaba sdang da ki arngut kiba la iasnohlang ha ka Sakramen Kyntiew-kurim.
Kawei ka dulir Vatican, ka Instrumentum Laboris (June 24, 2014), kaba kren halor ka bynta bad ka mission jong ka longiing longsem ka ong ba “ia ki longiing longsem dei ban shem thymmai biang kum ki atiar bakongsan ha ka kam ialap”. Ka la kdew ruh sha ka jingdonkam ban kham sngewthuh ia “ka kam mission jong ka longiing longsem kum ka balang rympei”. Kine ki jinghikai ki pynsawa biang ia ka jingong u John Paul II Bd., uba la ong ha u snem 1979 ha ka jingialang bad ki Bishop jong ka Latin America ba “ha ki sngi ban wan, kaba bun na ka kam jong ka jingialap kan shong eh ha ki balang rympei”.
Dei hangne ba u kpa ka iing, ka kmie, ki khun bad baroh ki dkhot jong ka iing ka sem ki shimbynta ia ka jinglong lyngdoh jong ki riewngeit ha ka rukom kaba kyrpang ‘da kaba pdiang ia ki sakramen, duwai, ainguh, ka jingsakhi ia ka jinglongkhuid, ka jinglenlade bad ka kam isynei. Kumta ka iing ka sem ka dei ka skul banyngkong jong ka jingim Khristan bad ka skul jong ka jingkyntiew ia ka longbriew manbriew. Hangne ki dkhot ki ioh jinghikai halor ka jingiaineh skhem bad ka jingkmen ha ka trei ka ktah, ka jingiaieid shipara, ka jingsbun, ka jingiaimap man la ka por bad ka jingmane Blei ha ki jingduwai bad ka jingaiti lut (CCC No. 1657).
Ka longiing longsem kum ka “balang rympei” ka dei ka jaka jong ka jingiakynduh bad u Khrist hapoh kawei ka iing ka sem Khristan – ka jaka ha kaba man la uwei pa uwei u dkhot jong ka longiing u don la ka bynta bakongsan. Ha kawei pat ka kyntien, ka mission jong ka longiing longsem ha ka kam jong ka jingialap ka dei ban long kumba la khot ia ka ban long – kata ka mut, ban im ia ka jingim ba man ka sngi kum ka iing ka sem Khristan lane kumba u John Paul II Bd. u iai ong bunsien, “Ko longiing longsem, to long kumba phi dei ban long!”

Ka Balang Rympei ha ka imlang ka sahlang:
Ka longiing longsem ka don ruh ki kamram ban ithuh ia ka jingiadei markylliang bad kiwei pat ki briew ha ka imlang ka sahlang. Ka Balang ka pynskhem ruh ia kane ka jingiadei ha ka hapdeng ki parabriew ha ka dulir Gaudium et spes. Ia ka longing longsem la ithuh kum ka kynhun bakyrpang ha ka imlang ka sahlang: kawei ka met kaba kynthup ia shibun ki dkhot. Kum ka kynhun bakyrpang, ka dei ban peit ban sumar bad ban pynbit pynbiang ia ki jingdonkam bapher bapher jong ki dkhot kiba ka kynthup, bad ha kajuh ka por ka don ruh la ka jong ka bthah ban nohsynniang ha ka imlang ka sahlang kaba ma ka hi ka long shibynta lane ka dkhot jong ka. Naba ka jingkhlain bad ka jingbit jingbiang jong ka longiing longsem ka wan na ka imlang ka sahlang, kumta ka longiing longsem ka hap ban nohsynniang sha ka imlang ka sahlang na ka bynta ka jingkhlain bad ka jingbit jingbiang jong ka. Ka dulir Vatican, ka Charter of the Rights of the Family (1983) ka la batai shai halor jong kane ka jingkitkhlieh jong ki longiing Katholik.

Ka Balang Rympei ha ka Balang Salonsar:
U Jisu u la jied ban shah kha bad ban heh ban san ha ka Longiing Longsem Bakhuid jong u Joseph bad ka Maria. Ka Balang kaba long ka nongleitkurim jong u Khrist kam dei kaei kaei hynrei ka ‘Longiing Longsem jong u Blei’ (CCC No. 1655).
Ka Balang Rympei ka dei ka balang hapoh jong ka Balang ha ka kyrdan longiing longsem. Ka Balang ka peit ka sumar ha ka kyrdan imlang sahlang katba ka longiing longsem ka peit ka sumar ha ka kyrdan longiing longsem. Ki kmie ki kpa kum ki lyngdoh ba la iohbor lyngba ka Sakrament Kyntiew-kurim ki don la ka bynta ban pyndep ha la iing la sem.
Khlem pep, haba ngi shim ia ki longiing longsem kum ki balang rympei, ngi dei ban shai bha ba ym lah ban pyniakhlad ia ka longiing longsem kum ka balang bad ka jingiakynduh lang jong ka kynhun Khristan ha ka Balang Salonsar ha ki Sngi-u-Trai bad kiwei pat ki sngi bakyrpang. Naba ka Balang kam thew ia ki saw kynroh ne ka jingtei hynrei ka thew ia ki briew. Haba ngi kynmaw ba ki Balang Khristan banyngkong ki dei ki balang iing – ym shym la don jingtei haba ki Khristan ki la sdang nyngkong ban ia mane Blei lang – ka shai bha ba ka Balang kam pynlong ia ki briew hynrei ki briew ki pynlong ia ka Balang. Ki longiing longsem, haba ki pyrshang ban kylla long ki jutang bakyntang jong ka jingieid bad ka jingaiti lut hapdeng jong ki bad ka jingiadei bad kiwei pat ki parabriew, ki long dashisha ki Balang ha ka jingim baman la ka sngi jong u khunbynriew.

Ki jingdonkam ban long ka Balang Rympei:
Ka Balang Rympei ka dei ban don ia kine harum:

1. U Jisu – khot ia u Jisu ban don lang (cf. Mt. 18:20).
2. Ka jinglongkhuid ki shikurim – ka jingkhuid ka poikha poiman (Heb. 13:4)
3. Ka jingknia da ka jingieid ba aiti lut – hapdeng ki shijur bad ki khun ki kti (1 Kor. 13)
4. Ka jinghikai niam – katkum ka Ktien u Blei (2 Tim. 3:14-17) bad ka jinghikai ka Balang.
   Ki mawdong jong ka Balang Rympei
   • Ka jingim jong ka longiing longsem ka long kaba kyntang
   • Ka jingtrei jingktah ne ka jingleh jingkam jong ka longiing longsem ka long kaba khuid
   • Ki longiing longsem ki don ka kam shakri bakyrpang
   • Ki longiing longsem ki dei ki kynhun ialap

Ka jingpynkut:
Da ka jingngeit, ki arngut ki sdang ia ka Balang Rympei lyngba ka Sakrament Kyntiew-kurim. Da kaba pdiang ia ki khun ki kti kum ki jingai jong u Blei (Psalm 127:3) bad ki soh jong ka jingieid, ki kmie ki kpa kiba long ki synran jong u Jisu ki shimkhia ruh ban pynlong synran ia ki khun ki kti da kaba hikai ia ki ban bud ia ki hukum u Jisu (cf. Mt. 28:19-20).
Da kaba duwai bad pule ia ka Ktien u Blei, ka jingshimbynta tista ha ka liturgy, ka jingpynsan ha ka liang ka mynsiem bad ka akor ka burom, ka jingsaindur ha ki kam shakri bad ki kam ialap, ki kmie ki kpa ki pynlong ia ka kolshor Katholik ha ki iing ki sem jong ki. Da kaba bet ia u symbai jong ka jingngeit, jingkyrmen bad jingieid (1 Kor. 13:13) ha ki dohnud jong ki khun jong ki, ki kmie ki kpa ki kdew ia ki khun sha u Jisu ban don ka jingiadei kaba jan bad U kaban pynspeh ia kine ki symbai bad ai jingim ia ki. Shuh shuh ki kmie ki kpa ki phai sha ki Sakramen na ka bynta ka jingaiei ban ai um ia kine ki symbai ba kin dup bteng ban san.
Ka jingim ha ka Jingngeit kaba la saindur ha ka Balang Rympei ka pynlong ia man la u dkhot jong ka longiing longsem u synran jong u Jisu Khrist bad u dkhot ba-im jong ka Met jong U, ka Balang. Da kaba ailad ban shah ialam ha u Mynsiem Bakhuid, ki dkhot jong ka longiing longsem ki shakri ia u Blei bad ia ki parabriew ha kane ka pyrthei bad sam ia u Khrist sha kiwei pat. Khatduh khatwai, ka jingiadei jong ki bad u Khrist bad ka Balang jong U hangne ha pyrthei, kum ki tnad jong u diengsohwain, kan ialam sha ka jingialong kawei bad u Blei – ban iohbynta ia ka jingim jingblei jong ka Triniti Bakhuid ha Bneng.
Kumba u Jisu u la wan ban seng ia ka Balang jong U lyngba ka Longiing Bakhuid jong ka Nazareth, to ma ngi ruh ngin pynlong ia ki longiing longsem jong ngi ki Balang Rympei kiba u Jisu u shong u sah ryngkat.