“Ka put ka tem ka pynim ia ka kolshor jong ka jaitbynriew”

Shillong,15 Nailur:
Ka Director jong Arts and Culture ka jylla ka kong Matsiewdor War hynne ka sngi ka la ai jingiaroh ia ka St. Jo seph’s Social Cultural Organisation (SJSCO) ryngkat ka jingiatreilang bad ka St Joseph Secondary School, Laitkor ia ka jingsdang jong ka ban pynrung ia ka ka tem ka put. Ka kong War ka la ong ba ka put ka tem ka long kaba donkam bha ha ka kano kano kolshor bad lyngba ka put ka tem lah ban pyneh ban pynim ia ka kolshor jong ka jaid bynriew.
Shuh shuh ka la ong ba na ka liang jong ka tnad jong ka, ka la shim ia ki lad ki lynti ban pyn neh ia ka kolshor jong ki riewlum ha kane ka jylla Meghalaya lyngba ka put ka tem, ka shad, ki riam.
Na ka liang ka kong War ka la kyntu ia ki paid bah ka jylla khamtam ia ki khynnah samla ba kin wan shakhmat ban kyn tiew ban pynsah ia ka kolshor bad ka sorkar jylla ka kloi ban noh ban ai jingiarap na bynta ki jingdonkam ha ka imlang sahlang.
Ha kajuh ka por la ong ba ka sorkar ka don ia ki skhim ban ai jingiarap na bynta ki jaka pule bad ha ki jaka ba ai jinghikai ha ka put ka tem. Kumjuh ruh ba ia ki nonghikai bad ki tiar tem la kynthup lang ha kane ka skhim.
Lyngba ka put ka tem ngin ioh bun ki jingmyntoi ha ka kolshor bad kane ka lah ban pynurlong tang lad don ka jingiatreilang bad ka tnad jong ka Arts and Culture ka sorkar jylla.
Katba na ka liang u Secretary ka St. Joseph Secondary School, Laitkor u Fr.Devasia u la ong ba ka put ka tem kadei kawei na ki sobjek ha kane ka skul namar ka kolshor ka long kaba donkam bha ha kine ki sngi mynta.
“U Blei u la ai ia ngi ka sap bad ngi dei ban pyndonkam ia ka sap kaba u la ai bad u Blei un sa iarap ia ngi”, la ong u Fr Devasia.
U la ong ba lyngba ka jingdon ryngkat lang ki kmie ki kpa ki khynnah ki lah ban leh bun ki kam.
La ioh ruh ka jingkren na u nonghikai put ka tem khasi u Bah Banniewkor Lyngdoh u la ong ba dei lynba ka jingai mynsiem jong u Blei ba la lah ban don bynta ha kane ka tem.
U la ong ba ka Helen Giri kaba la shongthait na NEHU ka la wanarah ia ka put ka tem ha ki skul bad kolej. Ka St. Anthony kolej ka la shim ia ka put ka tem kum kawei na ki honour sobjek bad ha NEHU la shim kum ka Diploma subjek.