KA JINGSHEPTIENG: Ki lad ban pyllait ialade na ki jingsheptieng bad khuslai jingmut

Kong Linda Kongwang

Ka jingsngew sheptieng bad ka jingkhuslai jingmut kidei ki jingsngew kiba khlainbor tam kiba don hapoh ka mynsiem jong ki briew namar kadon ka jingsngew ktah kaba jur bha haki jingmut jingpyrkhat bad haka met jongphi baroh kawei.

Haba ngi leh kìei kiei kiba kyrkieh ka jingsheptieng bad khuslai jingmut ki wan hi bad kilah ruh ban ktah wat haba ngim don haki jingma kum haka por exam, ka por kren paitbah, por ia kynduh samla nyngkong ne wat ha kino kino ki jingkhawai. Ka dei ka jingsngew kaba wan hi la kidei kiba shu mutdur hi ne ki jingshisha. Ka jingkhuslai ia kiei kiei kiban sawan la kidei kiba bha ne kiba sniew ka wanrah iaka jingsheptieng haka mynsiem kiba ngi ju pyrkhat ia kiei kiei na ka bynta ka lawei ban ia kaba mynta.

Ka jingkhuslai bad jingsheptieng kilah ban neh tang katto katne por bad kilah ban jah noh, hynrei kilah ruh ban neh slem lada phi neh sah haka jingtieng. Ha katto katne ki khep kilah ban shim iaka bynta kaba hakhmat eh jongka jingim jongphi kaba ktah iaka rukom bam rukom, ka rukom thiah rukom dem, ka rukom leit jingleit, ka rukom lehkmen haka jingim lane ban ieh iaka iing ban leit trei ne leit school. Kine baroh kilah ban pynkynrandien iaphi na kiei kiei kiba phi lah ne phi kwah ban leh bad kane ka ktah bha iaka jingkoit jingkhiah jongphi.

Don katto katne ki briew kiba ngam thlip haka jingsheptieng bad ki kwah ban kiar na kino kino ki jingjia kiba lah ban pyntieng ne pynkhuslai jingmut. Kalah ban long kaba eh ban pynduh iakine ki jingsngew hynrei ki don bun ki lad ban leh ban lait naka jingsheptieng.

KAEI KABA PYNLONG IAPHI BAN SHEPTIENG BAD KHUSLAI JINGMUT:–– Ki don bun kiei kiei kiba pynlong iaphi ban sheptieng bad khuslai jingmut. Ka jingtieng ia kiei kiei kum iaka ding kalah ban iada iaphi bad ka jingtieng ban shah rem kalah ban pynpyrshang iaphi ban nanglehbha khnang ba phin ym shah rem. Ia kaei phi sheptieng bad phin leh kumno haba phi sheptieng ia kiei kiei ka iapher bak-ly-bak na uwei u briew sha uwei pat. Tangban tip kaei kaba pynsheptieng iaphi bad kiei ki sienjam kiba nyngkong phin shim ban teh lakam iaka jingsheptieng kala biang ban lait naki jingsngew sheptieng. Hynrei phi tip ba ka jingkhuslai kadei kawei kaba lah ban pynsheptieng ia u briew kat haduh ban khuslai naka bynta ka lawei, na ka bynta ka iing ka sem ne naka bynta kiei kiei kiba pynkhih jingmut iaphi shaphang kiei kiban jia haki por ban dang wan ym ia kiei ki ba jia mynta. Ban pyrkhat than eh man la ka por kadei kawei naki jingpang kiba pynkhuslai jingmut iaphi baroh shi jingim. Hynrei lada phi pynleit jingmut ne pyrkhat tang iakaba bha, ki jingkhuslai jingmut bad jingsheptieng ruh kin jah noh bad phi lah ban tehlakam iaka jingbankhia haka bor pyrkhat.

KUMNO PHI SNGEWTHUH HABA PHI TIENG NE KHUSLAI:— Haba phi sngew sheptieng shisha, ka jingmut jingpyrkhat jongphi bad ka met jongphi ki tied sted bha. Kine harum kilah ban jia haba phi sheptieng ne khuslai:–

1. Ka jingtied sted jong u klongsnam.
2. Ka jingring bad pynhiar mynsiem kloi kloi.
3. Ka jingsngewtlot jong ki dohksah.
4. Ka jing mihsyep palat jong ka met.
5. Ymlah ban pynleit jingmut ia kiei kiei.
6. Ka jingsuh ka kpoh.
7. Ka jingsngew klumar jingmut.
8. Phi sngew khriat hangto hangto hi.
9. Phim lah bam
10. Ka jingmihsyep kaba khluit bad kaba khriat.
11. Phi sngew tyrkhong ka shyntur.

KUMNO BAN IARAP IALADE HABA WAN KA JINGSHEPTIENG

1. Ialeh pyrshah iaka jingsngew sheptieng:–– Lada man ka por phi lah ban kiar na kino kino ki jingjia kiba lah ban pyntieng iaphi, kane kan iarap iaphi ban lait naki jingtieng bad ka jingkhuslai haka jingmut jingpyrkhat kan duh kan dam noh bad lada phi sangeh ban pynleit jingmut ha kum kito ki por, phin ymlah ban tip la ki jingjia kidei kiba bha ne kiba sniew kumba phi pyrkhat bad kane kan iarap pynduh iaka jingsheptieng bad ka jingkhuslai jingmut kan duna. Kynmaw ba ka jingkhuslai jingmut palat ka ialam shaka jingsheptieng bad lada phi kiar na kino kino ki jingjia, ka jingsheptieng bad ka jingkhuslai jingmut kin jah syndon baroh shi jingim.
2. Sngewthuh ialade:— Pyrshang ban sngewthuh ialade shaphang kiei phi sheptieng lane kiei kiba pynkhuslai jingmut iaphi. Lada phi kwah bad buddien ialade balei phi sheptieng, philah ban buh da ki jingthoh shaphang ki jingkhuslai bad sheptieng bad kine ki jia mynno bad kaei kaba jia iaphi. Phi lah ban pyrshang da kaba pynrit ialade bad buh iaka thong ban jop iakane ka jingialeh pyrshah iaka jingsheptieng. Ban sngewthuh ialade phi lah ban leh kiei kiei kiba lah ban iarap ha ka por kaba phi sdang ban sngew sheptieng ne khuslai. Kane kalah ban dei ka lynti ban ioh kata ka jingngeit bad shaniah kaba don shadien jongka jingkhuslai jingmut.
3. Ban kilan met:— Ban kilan met kadei shisha ka dawai bah kaba lah ban pynduh iaki jingkhuslai jingmut bad ai ia ka jingkoit jingkhiah jongka met bad mynsiem bad lada phim khuslai ka jingmut jingpyrkhat, ka jingsheptieng ruh kan ym don satia. Namar kata lada phi kwah ban lait shisha na ki jingsheptieng, kynmaw ban kilan met man ka por namar ka jingkilan met ka donkam iaka por bad iaka jingpynleit jingmut bad kane ka iarap iaphi ban pynlait naki jingpyrkhat ba har rukom.
4. Pyn aram ialade:— Ban tip iaka buit kumno ban pyn aram ialade kan pynkhlain iaka jingsngew jongka bor met bad ka bor pyrkhat jongka jingsheptieng. Kalah ban iarap shisha tang daka ring bad pynhiar mynsiem jylliew lane pyrkhat ialade ba phi don haki jaka pyngngad ban pyn aram ialade. Phi lah ruh ban pyrshang da kaba leh Yoga, ban khem met lane phi lah ban pynshahshkor iaki jingkren shaphang ka jingkoit jingkhiah jong ka bor pyrkhat. Kine da shisha kilah ban pyllait iaphi naki jingkhuslai jingmut bad ban sheptieng.
5. Bam iaki jingbam ba tei met:— Ban bam iaki soh,ki jhur bad pyrshang ban kiar naki jingbam thiang, kilah ban iarap ymtang iaka bor met hynrei ka pynpyngngad ruh iaka jabieng bad ailad iaka bor pyrkhat ban pynjai jai ialade ban ym leh kyrkieh ne lynga mynsiem. Ki soh bad ki jhur kidei shisha ki dawai bah kiba bun kim sngewthuh hynrei ki iarap bha ha kum kine ki por. Namar kata ngim dei ban kiar nakaba bam iaki haba phi sngewthuh ba ki donkam naka bynta ka jingkoit jingkhiah jong phi. Haba kren shaphang ka jingkoit jingkhiah jongka met bad ka bor pyrkhat, pyrshang ban kiar na kaba dih iaka sha ne u kophi namar ki caffeine kiba don haki kilah ban nang kyntiew arshah iaki jingkhuslai jingmut kiba lah ban ialam shaka jing sheptieng.
6. Kiar ban dih Kyiad:–– Ka long kaei kaei kaba suk naka bynta ki briew ban dih kyiad haba ki sheptieng ne kyiuh bad don ruh ki briew ki shim baka kyiad kadei ka dawai bah ban pynjah iaki jingkhuslai jingmut bad lait naka jingsheptieng hynrei kim sngewthuh baka jingshah ktah hadien ka jingdih kyiad kalah ban nang kyntiew shuh shuh iaka jingtieng bad khuslai jingmut. Namar kata kiar katba lah ban dih kyiad khamtam haba phi khuslai jingmut bad sheptieng.