Ki eriong ba pynduh jingkyrmen ha ka jingiaid lynti ka jingim

Rev. B.P.Pohsngap

Nga ai khublei ia phi baroh, ha ka kyrteng U Jisu Khrist Uba U Trai Uba la jop ia ka jingiap bad U ba la kular ban iai long ryngkat bad ngi ha la ka sngi.

Kane ka por kaba ngi im mynta kaba ngim ioh shuh ban shakri Blei ha ki ing Mane, hynrei kiba ieit U Trai ha la ki ing ki sem ngi ioh ban mane laitluid ia U Trai. Ha kane ka sngi, nga sngewkmen ban ioh ia syllok bad phi; ia ka ktien U Blei, ka ktien ba don jingim, ka ktien ba ai jingkyrmen ha kane ka jingim, kaba dap da ki jingeh bad ki jingtynjuh ba bunjait. To ngin ia pule na ka ktien U Blei na ka kitab, ki kam ki Apostol lynnong 27 : ki dkhot 13 -25.

Na kine ki dkhot kiba ngi pule, ka khubor kaba ngin ia syllok :-
Ngi im ha kane ka sla pyrthei, da shisha ngi long ki nongwei, ki soh shnong, ba shong ba sah, tang shipor, “Namar ka jinglong trai shnong jong ngi ka long ha bneng”, kumba ong u Apostol Paul ha ki Philipi 3:20. Ha ka jingiaid lynti ha kane ka jingim kaba tang shipor, teng teng ngi klet ngi sngew kum ban shongduh ha kane ka pyrthei, na kata ka daw, ki briew kiba don ba em, ki thaw ki ing dulan, ing paki, i kumba kin nym iap shuh, to kiba don ba em ka biang hi, hynrei ngim dei ban klet , kiba shong ing trep, ne kiba shong ing wai, ha kaba khatduh hi ngim ia pher, namar baroh ngi long tang para ba ia shong ing trep ha kane ka doh, ba shisien ka sngi, ngin hap mih noh, na ing trep ba ngi don ong U Apostol Paul 2 Kor 5:1, “Namar ngi tip skhem ba lada yn lied noh ia ka ing jong ngi kaba ha ka khyndew kane ka ing trep kein ngi don ka jingtei na U Blei, ka ing ba la thaw bym da ki kti , ka bymjukut ha ki bneng”.

Na kane ka lynnong kaba ngi la pule, ngi iohi ia ka jingiaid lynti, kaba U Blei U la buh ia ngi ha kane ka pyrthei, ym ban ioh iaid tang ha ka jingsuk jingkmen. Ngi dei ban iaid, ngi dei ban ia kynduh ia kiei kiei kiba ngin iashem, ki jingkhuslai, ki jingjynjar ba bun jait ha kane ka jingim. U Apostol Paul lem bad ki nong bud jong U, haba ki iaid lynti ban leit sha Rom, ki dei ban iaid lyngba ki duriaw ba khraw. Ha kane ka jingiaid jong ki, kyndit la wan ka eriong na ryngkew, kaba la khot Iurakuilo ne Eu-roc-ly don – (A stormy north east wind of the Levant) kam 27:14 : kane ka dei ka eriong kaba wan na ryngkew, kaba shyrkhei bha. Na kane ka jingiaid lynti , “ki la mut ban ioh ia kaba la thmu”, hynrei kane ka eriong kaba khraw ka la wan ban lynshop jur ia ki, ki la sheptieng, bad wad ia ki tiar ki tar, ki la bret noh baroh shapoh duriaw, tang ban pynsting ia ka lieng kaba ki shong, bad ha kane ka por kein la ong, “ba ka sngi lymne ki khlur, kim paw shuh ha ki bun sngi, bad ka eriong kaba jur ka la ban khia ha ki, ka jingkyrmen ban im ka la duh noh”. Don artylli ki bynta, ba ngin iakren ha kane ka por :-

1. Ka por jynjar kaba kim tip shuh kumno ban leh : “ Dk.20. Te mynba ka sngi lymne , ki khlur, kim paw shuh ha ngi bun sngi”, kane ka jingiaid lynti ka iasyriem ia kaba ngi ia shem mynta, kane ka jingpang ba triem, ka la pynkhynniuh ia ka pyrthei baroh kawei, ka Ri India jong ngi ruh, ka Meghalaya jong ngi ruh, bad ngi ruh marwei marwei, ha la ki jong ki jong ki ing ki sem, sngew kumba ka sngi ka la dum sah, u bnai , ki khlur sngew kumba ym iohi shuh. Ha kane ka por, U Apostol Paul, uba long u nongialam ba don shisha ka bor Blei ha u, U Blei ruh U la iohi ia kane ka jingiashem jingeh, jingtynjuh ba khraw, bad ha kum kane ka por, wat ka jingbam jingdih ruh kim ioh shuh ban bam. Ka dkhot 21, ka iathuh ia ngi, “Hynrei ynda ngi la long slem khlem jingbam”. Ka long ka rukom briew ban khuslai ban jynjar nyngkong eh ia ka jingbam, namar ngi la sngewthuh , lada khlem ioh bam shuh ym lah ban im. Ngi la iohi, ngi la iohsngew mynta kylleng ki jaka kiba leit ai jingiarap ia kiba duk ba rangli namar ioh ki iap thngan. Ka sorkar ba donburom ka la ialeh ban pynbiang ka bam ka dih. Ainguh I’U Blei hangne ia mynta ngim pat iashem ia kaba kum kata, ki synran U Jisu “ki la long slem khlem jingbam”, ym lah ruh ban mutdur kata ka jingjynjar kaba kim tip shuh kumno ban leh. Ngin duwai jur ba kaba kum kata kan nym jia ha ngi AMEN!
2. “Ka jingkyrmen ban im ka la duh”. : kaba kum kane ka jingiashem, ban poi ha uta u pud, ba “ka jingkyrmen ban im ka la duh noh”. Ngam tip na pdeng jong phi, phi la ju mad ne em, kaba kum kata ha ka jingim? Nga nga la mad shisien ba hadien ba ngi wan peit (survey) ia ka Karbi Anglong (ha kito ki por la khot ka Mikir Hills) namar ba ngi shah dait skain shimiet shimiet haba ngi thiah hapoh jeep nga & i Bah August Kharkongor (dei ka kali jong i kaba la iuh kjat nyngkong eh ha Karbi Anglong ) Nga ioh ka jingpang khieshoh, ha kaba la kit ia nga sha Jowai, ynda ngi hiar na kali (Bus) la btin i maduh ia nga haba ngi iaid ha surok, kynsan la kiew ka jingshitom bad nga la jan dkut mynsiem nga la mut beit ba ngan khlad noh ha kata ka por, bad haba kum kata ka khyllipmat nga la khot ia ka kyrteng U Jisu bad nga ong, ÏAROH IÚ TRAI” hamar kata ka por nga kyndit thred, nga sngewthuh ba nga la im. Da shisha ban poi ha ka por ba la duh jingkyrmen ban im te ka long kaba la sngew sangsot shisha shisha. Kine ki bangeit ryngkat bad U Paul, ki la mad ia kane bad ha kata ka khyllipmat, “U Angel U Blei U wan ieng hajan jong U, bad U ong to wat sheptieng, “Ha khmih ruh U Blei U la ai ha Me ia kito baroh kiba iaid lieng lem bad Me”. “Naba kumta to sngew shngain phi, ko rangbah; namar nga ngeit ia U Blei, ba kan long kumta kumba la kren ha nga”. Haba ia kren ia kane ka jingduh jingkyrmen ban im, ka pynkynmaw ia ngi ia u Jonah, uba la don ha kata ka jinglong duh jingkyrmen ban im, hynrei U Blei da ka bor jong U, U lah ban pyllait na ka jingduh jingkyrmen da shisha.

Ko kiba ieit jong U Trai, to ngin tip ia kane ka jingshisha, ba U Blei U long U Juh hynnin, mynta bad sha bymjukut. Uba ha ki eriong ba pynduh jingkyrmen, ha ka jingiaid lynti jong ka jingim, la ha ki por jynjar kaba ngim tip shuh kumno ban leh, hynrei ma U Un isynei ban pyllait ia ngi, bad la ngi iaid na ka lynti, ba la duh jingkyrmen ban im ruh, dei hangta ka kti jong U kan kner ban rah ia ngi, ban lait na ka bor ka jingiap. Ka don ka jingrwai shem mynsiem kaba la pynkylla da i Bah Dharmo Ray, i la pynkylla na ka Hym Book AH 379, kaba la don ha ka JSM No. 533.

2. La ha jingmynsaw nga don, Jisu U wan iarap,
   Da jingieit U rah ia nga, U pyllait na jingiap;
   U Jisu Kynrad jong nga, U long ba donbor tam,
   Nongpynim baieit jong nga, U rah ia nga;

Kho:- U rah ia nga (2)
U Jisu U ieit shisha, U rah ia nga, 2

3. Haba jingsngewsih ki wan, kum jingatphyllung bah,
   U Jisu ba ieit hajan, ha ki tyrpeng U rah;
   U pynduh baroh khuslai, U Pyndap da jingkmen,
   Kiba sngap jingkren U Trai, kin shem jingkmen.

To U Trai Un kyrkhu ia phi baroh , na ka bynta ka burom jong U Haleliwia.. Amen …..