Ka Jylla ha syrngiew ka Lashai

Da I P/P Emlangmi Sapuh,
Iooksi, Musniang, Jaintia Hills.

Hadien shibnai tam jong ka jingkhangdam (Lockdown) nga la ïoh lad ban kylli ïa kiba bun ki long ïing, kaei phi sheptieng eh ha kaba kum kane ka por? Ki la jubab ngim da sheptieng haduh katta ïa ka jingïap na ka khlam hynrei kaba ngi sheptieng eh mynta ka long “ïoh ba ngin iap na kaba ïap thngan”. Kane ka jubab jong ki ka la ktik ne kynshoit ïa ka jingmut jingpyrkhat jong nga bad nga la kylli marwei marwei balei ki sheptieng ïa ka jingiap thngan? Ka jubab ka long ba haduh mynta ka jylla jong ngi ka dang shaniah ïa kiba bun ki marbam (essential food items) na shabar kum u khaw, jhur, doh bad kiwei. Kaba mut lada khang ïa ki marbam ban wan nabar kiba bun ha ka jylla kin ïap thngan.

Kumta, ka thar (scope) jong ka jingthoh ka long ban tyrsat kat ka jingmut kaba ioh da ka jingkyrmen ba ki kyntien ki ban mih baroh kin long kum “shi maw san tylli ki sim kin hap.” Nga ngeit ba ki nongpule kin ïoh tam ia ki symboh pyrkhat kiba don ha ki.

Ka im bad ka iap ka jylla la sdien ha ka jingshngaiñ ha ka bam ka dih (food security). Ban pynmih ïa ka bam ka dih kaba dap pura donkam ïa ki nongialam kiba stad, kiba buh ia ka rep ka riang bad ka ri jingri kum ka kam kaba ha khmat eh ban kyntiew, (first priority) ha ka juh ka por donkam ïa ki samla kiba smat ba sting kiba kloi ban trei naduh ka mynsiem bad kiba don jingtip ïa ka rukom katkum ka jingïaid jong ka por.
Haba peit bniah bha ngi ïohi kumba kiba bun ki khun samla ha ka jylla jong ngi kim sngewtynnad ïa kane ka jait kam. Wat kito kiba trei ïa kane ka kam ruh ki shim ïa ka tang na ka jing bymbanse, kim shym la shim ba ka dei ka kam kaba kongsan. Mynta, kat shaba ngi leit ngi ïohsngew ba ki samla ki ud namar ka jingkyrduh kam (unemployment), kane ka jingkyrduh kam kiba bun ki samla pule ka pynmih ruh ïa ki jingsniew ba bunjait ha ka imlang ka sahlang. Napdeng kito ki samla kiba kyrduh kam don bun napdeng jong ki kiba don ki jaka ki puta ki kper ki prah kiba biang ban rep ban riang bad ban ri jing ri, hynrei kim kloi ban trei (engage) ïa kane ka kam namar ki ong ba kam dei ka kam kaba lah ban kyntiew ïa ka ïoh ka kot bad ba donburom.

Ka sorkar India ka don ïa ki Ophis kiba kyrpang (Department) ka Agriculture & Farmers Welfare bad kumjuh ka Animal Husbandry & Veterinary na ka bynta ban kyntiew ïa ka rep ka riang bad ka ri jingri ha ka ri bad ka jylla. Ka don ïa ki department kum ka Agriculture, Horticulture, Veterinary, Fishery, C&RD, NABARD bad kiwei kiwei ban ai jinghikai bad ban iarap ïa ki nongrep bad ki nongri jingri lyngba ki lad (scheme) bapher bapher. Ngi sngewkmen ruh ba ka jylla ka don ïa ka Indian Council of Agricultural Research (ICAR) kane ka shlem ka ïarap shibun ia ki nongrep bad ki nongri jingri ban tip bniah ïa kane ka kam; bad hapoh jong ka ka don ïa kawei ka tnad, ka Krishi Vigyan Kendra (KVK) kane ka tnad ka ai jinghikai (training) ïa ki samla kiba don jingthmu (interest) ha ka kam rep kam riang, ri jingri bad kiwei kiwei ki jinghikai. Ha ka juh ka por ka ju ai jingïarap ruh katba lah kum ki symbai, ki kor rep kat kum ka juk bad kiwei ki jingiarap ia kito ki samla kiba la pyndep ia ki jingshah hikai khnang ba kin ïoh ban sdang ïa ki kam jong ki da ka jingthmu ban kyntiew ïa ka ioh ka kot ïa ki nongtrei bad ïa ka jylla.
Khnang ba ha kawei ka sngi ka jylla kan lait na kaba shaniah ïa ki marbam ban wan na shabar nga sngewdei ban kdew ia kine harum ki jingai jingmut (suggestion) lane ki symboh pyrkhat:
Ka bynta ha ka pyrkhat pyrdaiñ: ka pyrkhat pyrdain ka dei ka wei (unit) kaba synshar ia ka maiñ (dignity), ia ka burom (respect) bad ka jinglong (being) ka jong ki briew. Ka pyrkhat ka jong ki briew ka dei ban long kaba da saiñdur khnang ba ynda la kren ne leh ia ka kam kan ym pynhiar kyrdan ialade ne ia kiwei ruh. Ka jingiaburom markylliang ha ka jait kam ba ngi trei (dignity of labour) ka long tang ma ka ka atiar ban kyntiew ïa ka ïoh ka kot jong ka Ri. Ngi im ha ka pyrthei ha kaba la ju pyrkhat ba ka Intellectual labour lane kaba trei da ka bor jabieng kum kaba trei ha ki ophis, skul bad kiwei ki long ki kam kiba don burom. Hynrei ïa ka manual labour lane kaba trei da ka bor met kum ka kam bym da donburom eh. Kaba kum kane ka rukom pyrkhat ka pynduh nong shibun ïa ka Ri bad ka jylla, namarkata ka pyrkhat pyrdaiñ shaphang ka kam ka jam kam dei ban long kaba noh shiliang ha ka jingthew hynrei ka dei ban don ka jingiwbih kaba sieng ban tei ïa ka longbriew manbriew.
Ka bynta ki jaka pule: wat lada ka Ministry of Human Resource Development jong ka Ri India kaba ju khot Ministry of Education ka don ïa ki jaka pule ba kyrpang na ka bynta ka rep ka riang bad ri jingri, hynrei ngi iohi ba kiba leit pyntbit sha kane ka jingpule bunsien ki lah ban leit hadien ba kila pyndep ïa ka secondary school shaneng. Kumta, haba peit thuh bha I kumba kan kham bha shibun lada ka tnad pule kan kynthup ïa ka jinghikai shaphang ka rep ka riang bad ka ri jingri kum kawei na ka subjek ba kynthup lang (General subject) naduh ki klas kiba dang rit lane ki primary level, ha ka juh ka por la i dei ba ki skul kin don ïa ki kper ne pynthor ba ki nongpule kin ïoh lad ban trei (practical) ruh khnang ba kin nang ban trei bad ban hikai ruh ïa kiwei. Ka proverb ka ong “To hikai ïa u khynnah ha ka lynti ba u dei ban leit te un ym kynriah na ka.”
Ka Bynta ki Long ïing long sem: u Lao Tsu (Chinese philosopher) u ong, lada phi ai ïa u briew uba thngan ka dohkha ban bam phi pynkdang ia u shi sngi, hynrei lada phi hikai ïa u ban khwai dohkha, phi pynkdang ia u baroh shi jingim. (If you give a hungry man a fish, you feed him for a day, but if you teach him how to fish, you feed him for a lifetime). Ha ka juh ka rukom ngi ïohi mynta ki longkmie longkpa ki pynbiang lut ïa ki khun ki kti jong ki ïa ki jingbam kiba bha ban bam kum ki jhur bad ka doh man ka sngi. Hynrei, ban hikai pat ïa ki khun jong ki ban rep ban riang bad ban ri jingri kim da sngewdonkam. Namarkata, ngi shem ba kiba bun ki samla mynta khamtam ha kaba kum kane ka por kyrduh kam kyrduh jam ki shu shang makia bad ki im tang ha kaba khrong ne shaniah sah na kiba ha ïing na sem, hooid katba dang don kita kiba kyrshan ïa ki te ka biang hynrei ynda ym don shuh kita kiba ju ïarap ia ki mano pat ban kyrshan ia ki? Namarkata ki longkmie longkpa kim dei ban sngewhun tang ban pynioh ïa ki khun ïa ka jingnang jingstad ne tang ban nang ban thoh ban tar ne bat khulom bad computer, ki dei ruh ban hikai ïa ki ban nang ban bat wait ne mohkhiew.
Ka bynta jong ki kynhun Ñiam: Haba peit ïa ki kam jong kiba bun ki kynhun Ñiam ba ki trei ha kine ki sngi lah ban ong ba ki la pyrshang bun kiei kiei na ka bynta ban kyntiew ïa ka long briew man briew lyngba ki projek bapher bapher. Hynrei, ha kaba ïa dei bad ka rep ka riang bad ri jingri imat kiba bun ki kynhun Ñiam ki dang sah dien bha. Ka don ka jing ong “Haba ka kpoh ka thngan ki briew ki donkam ia ka jingbam bad haba ka mynsiem ka thngan
ki donkam ia ka jingduwai. Kumta ki kynhun Ñiam ha ka jylla wat lada ki trei ia ki kam ba kynja mynsiem hynrei i kumba ka por ka dawa ruh ban pyniar ia ka jingtrei shabar na ki kynroh ïing mane lane ban nang pyniar ia ka Social Gospel. ka Rural Resource Training Center (RRTC), Umran kaba la ju khot mynshwa ka St. Joseph’s Agricultural Training Centre (SJATC) ka long ka nuksa kaba khraw ia kiwei pat ki kynhun Ñiam ha ka jylla. Ka donkam namar kata ban wad ia ki lad ki lynti bad ialeh katba lah ban rad diengkhong ia kine ki jingeh kiba ka jylla ka ia kynduh.
Kumta, ha kaba kum kane ka por jong ka lockdown to ngin ym pynlehnohei ïa ka por ba kordor bad to ngin sdang na lade ban pyndonkam hok ïa ki jaka ha ki phyllaw ïing jong ngi ne ha ki kper, wat la ki long tang ki jaka ki ba rit ruh da kaba ngin sdang ban thung ïala ki jong ki jhur kum u sohsaw, sohkhia, mator, pudina bad kumta ter ter; kan long ruh ka jinghun mynsiem haba ngi ioh ban kheit hi ïa ki jhur kiba ngi hi ngi thung bad bam ïa ka doh kaba ngi hi ngi ri ngi sumar. Ïa kane lah ban leh tang lada ki paid jong ka jylla ki don ïa ka mon kaba jwat, ha ka juh ka rukom tang lada ki khun samla ki don ka mon ban trei ïa kane ka kam ka jylla kan long kaba khlaiñ bad kaba shngaiñ. Ha ka juh ka rukom ka sorkar ruh ka dei ban pyntikna ban pynioh ïa ki jingiarap sha ki paidbah kumba la pynbna ha ki lad pathai khubor na ka por sha ka por khnang ba kan long ka jingai mynsiem ïa kito kiba long kloi ban trei, lymkumta ka lashai jong ka jylla ka ap ïa ka syrngiew jong ka jingïap thngan.