Kyntu ka sorkar Meghalaya ia ki paidbah ban phone sha 108 lada don ba wanphai na Guwahati

Shillong: U symbud myntri rangbah ka jylla u bah Prestone Tynsong mynta ka sngi u la kyntu ia ki paidbah ban pyntip sha ka sorkar daka ba phone ha u nomber 108 lada don kiba leit donkam shapoh ka hospital Guwahati Medical College bad ha Dr. B. Burma Cancer Institute na Guwahati shwa ne hadien ka 23 tarik iaiong 2020.

U bah Prestone Tynsong, u la ong ba ka sorkar ka la shim ia kane ka rai ban lum kyrteng ia kiba wan donkam na kine ki 2 tylli hospital, hadien ba kine 2 tylli ki hospital ki la ngat ka jing pang’corona virus’ ha kaba 1 na ki i la khlad noh ha ka 7 tarik jymmang 2020.

Na ka liang u symbud myntri rangbah ka jylla, u la iathuh ba katkum ka kaiphod na ka sorkar Assam, la iathuh ba la don katto katne ngut napoh ka jylla Meghalaya kiba wan donkam ha kine 2 tylli ki hospital.

“Namar ba ha kine 2 tylli ki hospital, la wan ngat ka jing pang ‘corona Virus’, kumta ka sorkar Meghalaya kan hap ban lum kyrteng ia baroh kiba wan donkam ha kine 2 tylli ki hospital” la bynrap u bah Prestone Tynsong.

Halor kane naka liang u symbud myntri rangbah ka jylla, u la kyntu ia ki paidbah ba kim dei ban sheptieng hynrei baroh ki dei ban sngap bad bud ryntih ia ki kyndon ka tnat ka koit ka khiah ka jylla.