KA MISION BA AR BAD BA LAI U JISU KHRIST

Ng.Khonglah

KA JINGLAMPHRANG:
(1) Ka ktien Mission ka dei kaba iar. Ka jingmut tynrai kum ka noun ka mut ka jingphah khnang na ka bynta kano kano ka jingthmu.
(2) Ka kynhun jong ki briew kiba la phah kyrpang na ka bynta kano kano ka jingthmu.
Nuksa: kawei na ka mission ha ka pyrthei jong kane ka juk kaba sah jingkynmaw ka dei ka jingphah kem ba jar jar ki shipai Amerika ia u Osama Bin Laden, ka dei ka mission kaba jop lah ban ong.
KA MISSION U JISU KRIST
Ha ka mission ba nyngkong u Jisu Khrist u la jied ia ki nongtong dohkha kiba long ki briew kiba khlain, ba shlur, bad doh satar ha ka kam bad kiba iar ka jingmut jingpyrkhat hadien ba u la dep ai jinghikai (training) ia ki 3 (lai) snem tam bad u la phah ia ki ban pyndep ia ka mission jong u ban leit pynsngew ia ka khubor jong ka jingpynim ia ki mynsiem sha ka pyrthei baroh kawei. Namar kata kein, “To khie da leit noh ma phi to pynlong synran ia ki bynriew baroh, da pynbaptis ia ki ha ka kyrteng ka jong u Kpa bad ka jong u khun bad ka jong u Mynsiem Bakhuid”. Ia ki jinghikai u Jisu la thoh ha ki saw Gospel jong ka Testament ba thymmai. Da hikai ia ki ban sumar ia kiei kiei baroh kat kiba nga la hikai ia phi (Math 28:19-20). Lah ban ong ba ki synran u Jisu Khrist ki la pyndep ia kaei kaba u Jisu Khrist u la phah ha ka por jong ki.
KA MISSION KABA AR:
“U te u la ong ha u, don uwei u briew uba khreh ia ka jingkhawai miet kaba khraw bad u khot bun ki briew, bad u la phah ia la u shakri ha ka por kata ka jingkhawai miet, ia ka ban ong ha kita kiba la khot: “To wan, naba la khreh ia kiei kiei baroh”
Hynrei kita kiba la shah khot kim treh ban wan namar ba ki don la ki jong ki jong ki daw. Ynda kumta uta u Trai ing ba u da sngewbitar, u la ong ha la u shakri, “Khie leit kumne kumne ruh sha ki lynti bah (street) bad lynti rit, lynti lyngkha (lanes) ka shnong bad wallam shapoh shane ia kiba duk, kiba kynriang, kiba matlah bad kiba dkoh. Uta u shakri te u la ong, Ko kynrad, la leh kumba me la hukum, hynrei dang don jaka. Uta u trai ing u la ong te ha uta u shakri “khei leit sha ki lynti bah (highway) bad lynti lyngkha (hedge) to pynbor ia ki ban wan shapoh, ba yn pyndap ia ka ing jong nga” (Luk 14:16-23). Pule ia baroh ka bynta khnang ban suk ban sngewthuh.
Ka jingmut jong kane ka pharshi ka long kaba iar haduh katta katta. Ka dei hi ka bynta kaba ar bad balai jong ka mission u Jisu Khrist, kaba don hapoh u pud u sam jong ka mission hi baroh kawei. Hynrei, wat la ka dei ka pharshi, sngew kumba kam dei ka pharshi namar ba ym shym don kano kano kaba la buhrieh ha ka. Ka long kaba suk ban sngewthuh bad ba jem ban leh ha la ka jong ka jong ka bor. Ka long kaba lah ban leh wat tang marwei, haba don ka mon ban leh.
Don lai ki mat ba kongsan ban ia bishar bad ia sngewthuh.

1. Kumta uta u trai ing u la sngewbitar bad u ai ka hukum ia la u shakri, ka hukum kaba da ka jingsngewbitar.
   Kumta ngi sngewthuh ba ka dei ka hukum kaba khot bad ba dei ban leh khlem ia ai nia da kumwei pat. Dei ruh ban leh thik kumba la phah bad batai. Ym dei ban pynslem ban leh, lada pheil ban leh, ka jingpynshitom ka long kaba tyngeh. Kaba kham sngewpher shuh shuh, ka long ban wallam ia kiba duk, kiba kynriang, kiba matlah bad kiba dkoh ban pynkylla ia ki sha ki VIP, kaba long mar khongpong ia ka rukom pyrkhat briew.
2. Ka hukum kaba kyrkieh: U da ong, khie leit kumne kumne. Ka mut kaba ym bit ban pynslem, ym bit ban buhteng. Namar lada buhteng, u nongshun u lah ban rong noh ia kita ki mynsiem ba kordor. Lada pynslem u nong shun un shim kabu, namar ba ki don ha tmier jong ka riat, uba sniew u nongshun u lah ban pynngop ia ki. Ka banse ka thom ia ka sang. Haba kyrduh, ka jem ban ngat ha ki jingpynshoi u bymman.
3. Uta u kynrad u la ong te ha uta u shakri khie leit sha ki lynti bah (highway) bad lynti lyngkha (hedge) to pynbor ia ki ban wan shapoh ban pyndap ia ka ing jong nga.

Kane ka hukum ka dei kaba kham khor bad kham eh ban leh. Uta u kynrad u ong, ba dei ban khot ia ki bad lada kim treh dei ban da pynbor ia ki. Kumno phin pynbor ia ki briew kiba phim ithuh ithaw. Lah ban pynbor ia u paralok ba ia jan, hynrei ym lah ban pynbor ia u bym dei paralok. Ynda iadei paralok bha badno badno lah ban pynbor ha kano kano ka rukom. Kumta ngi sngewthuh ba ngi dei ban len ia ka lade jong ngi khnang ba ngi lah ban wallam ia ki sha ka jingkhawai shongkurim u Khun Langbrot u Blei. Ngi dei ban leit kylleng kylleng sha sor bad sha nongkyndong ban shong ban sah bad ki, ban ialong paralok bad ki, ban ia shah shitom lem ha ka pang ka shitom ha kino kino ki jingeh bad ki. Lada ngim leh kumta ngim lah ban pynbor ia ki ban wan sha ka ing u Trai.

Ki Missionary haba ki wan shane sha ri jong ngi ki leh thik umba la phah u Trai. U Dr.Robert ka Hospital Jaiaw, um don ki nongpang, u don tang ki paralok (ki nongpang ki dei ki paralok jong u).

Ha kane ka pharshi, uta u briew uba la khreh ia kata ka jingkhawai miet u dei u Jisu Khrist hi “Na ba nga ong ia phi ba ym don uwei na kita ki briew ia kiba la khot u ban ioh mad ia ka jingkhawai jong nga”. Kita kiba la khot ki dei ki VIP, kiba riewspah, kiba ka imlang sahlang ka burom, tangba ki dei ki briew kiba bunkam, kiba don ka spah ka phew, ka jaka ka puta, kiba heh ka kamai kajih bad kiba wad ia ki jingsngewbha jong ka doh. Pule bniah na ka jingthoh, phin shem ia kata. Kine ki kyntien ki long kiba shai bad kiba shisha (Luke 14:24). Ym lah ban thoh bniah ia ka jingmut jong kane ka phang ha kane ka article, hynrei tang ki mat ba kongsan ruh ka la biang hi. Kiba kwah ban shai pule hi na ka Bible.
LANO BAD HANGNO KANE KA JINGKHAWAI KAN LONG?
“To ngin ia kmen bad ngin ia shad kmen bad to ngin ia ai burom ha u, naba ka jingshongkurim u Khun Langbrot ka la jia bad ka tnga jong u ka la pynkhreh ialade” Jingpynpaw 19:7. U Jisu u ong ia la ki synran, ha ing u kpa jong nga don bun ki pulit shongneh, naba ngan sa leit noh bad ba nga la khreh ia phi ka jaka, ngan wan pat bad ngan shimti ia phi halade hi, ba ha kaba nga long ma nga, phi ruh phi lah ban long. Ioannis 14:2-3. U Jisu Khrist u la kren shai bad kular shai ia la ki synran bad shakri. “Ha ka ing u Kpa jong nga don bun ki pulit shongneh (permanent resident place). Lymda kumta, nga la iathuh ha phi, naba ngan sa leit noh ban khreh ka jaka ia phi, bad ba nga la khreh ia phi ka jaka, ngan wan pat bad ngan shimti ia phi ha lade hi, ba ha kaba nga long ma nga, phi ruh phi lah ban long”. Ym don uno uno ruh u nongseng niam uba lah ban kular ia kine kiei kiei kiba u Jisu Khrist u kular. Kane ka pynshisha ia ka jinglong Blei ba shisha jong u hi. Bad u la pynkhreh ruh ia kata ka jingkhawai ynda un wan shaw ia la ki jong ki briew ban ialam sha kata ka jingkhawai shongkurim u Khun Langbrot.
To ngin ia kmen bad ngin ia shad kmen bad to ngin ia ai ka burom ha u, naba ka jingshongkurim u Khun Langbrot ka la jia bad ka tnga jong u ka la pynkhreh ialade. Te la ai ha ka ba kan da ioh kup ia ka jain linen bani, bakhuid bad ba tyngshain, namar kata ka jain linen bani ka long kein ki jingleh hok jong ki riewkhuid.

KA JINGWAN SHAW U JISU IA LA KA BALANG BAN IALAM SHA KA JINGKHAWAI U KHUN LANGBROT
“Namar kane ngi ong ha phi da ka ktien u Trai, ba ma ngi kiba dang im ia kiba la pynsah haduh kata ka jingwan u Trai, da lei lei ngin ym ioh leit shuwa ia kita kiba la iohthiah (kiba la iap ha u Trai). Naba u Trai hi un wan hiar na bneng bad ka jingrisa, da ka ktien sawa u angel rangbah bad da ka turoi u Blei bad kita kiba la iap ha u Khrist kin ia mihpat shuwa. Ynda kumta ma ngi kiba dang im, ia kiba la pynsah, yn rong noh ia ngi lem bad ki ha ki lyoh, ia kaban ia shem ia u Trai ha suin bneng. Te kumta ngin iai long junom junom lem bad u Trai.

Bad u ong ha nga “TO THOH; SUK KITA IAKIBA LA KHOT SHA KATA KA JINGKHAWAI MIET KA JINGSHONGKURIM UTA U KHUN LANGBROT”. U ong ruh ha nga, kine ki long ki ktien bashisha jong u Blei. La pynskhem shuh da kine ki ktien.
KIBA LA SHAH KHOT SHA KA JINGKHAWAI BAD KIM WAN KI DEI KIEI?
Ki dei ki riew donburom, kiba bunkam ha ka ialum spah, kamai spah,beh spah bad jingsngewbha jong ka doh. Ki kham khein kor ia ki kam jong ki ban ia kaba leh ia ka hukum u Trai Jisu Khrist.
KABA DONKAM BAN TIP
Hadien ka jingrongnoh u Jisu Khrist ia la ka balang sha kata ka jingkhawai ha bneng, kin don shibun ki Khristan ba la shu khot kin sah shadien. Kan don ka jingkyndit jong kiba bun ki briew jong baroh ki kynhun balang bapher bapher. Ha kata ka por kan don ka jingkyndit bynriew jong kiba bun ki khristan ba shu khot. Ha i por ba lyngkot kan sdang kata ka por jong ka jingjynjar bah ba khraw ka bym pat ju jia bad ka ban nym jia shuh lano lano ruh Math 24:21. Hapoh ka jingsynshar lahduh uta u briew jong ka pop, u khrist lamler ka ban neh 7 (hynniew) snem. Baroh ki khristan bym shah rong kin hap ban shah shitom haduh ka jingiap. Kin don shibun ki ban shah pyniap na ka bynta ka jingphla jong ki, ha ka por ba synshar u khrist lamler. Yn tip ia ki kum ki martal jongka jingjynjar bah bakharaw. “BAD LA AI HA U IA KA BOR SYNSHAR BAN SAH SAWPHEW AR BNAI” bad yn pynkut ia ka jingsynshar jong u da kata ka jingwan arsien u Jisu Khrist ha Jerusalem.
“SUK UTA U BAN BAM JINGBAM HA KA HIMA U BLEI” LUKE 14:15
Jer 30:5, Dan 12:1, Math 24:21-29
Kane ka jingthoh barit ka kyntu ia ki balang khristan na sor ban leit sha ki jaka nongkyndong kiba ka jingshai jong ka Kospel u Jisu Khrist kam pat ioh jaka shisha. Ka thain Raid Mawja ba tang 10-15 km na Pynursla, ka dang dei ka thain kaba donkam eh ia ki khristan na sor ba kin pynpaw ia ka jingieit Blei ba shisha ha kito ki briew. Plie ia ki jaka ai jingsumar (health care centre) ha ka rukom ne ka dur ba kynja khristan, bad kiwei kiwei ki lad ki lynti kiba donkam, kiba lah ban pynpaw ia kata ka jingieit jong u Blei ba kynja khristan. Lada ki balang khristan ha sor ki lah ban tei ia ki ingmane ba rem dor da ki klur, kan eh aiu ban phah ia ki shipai khristan (Christian soldier) sha kito ki jaka ba dang dei ban leit, ban pynbor ia ki ban wan ha ka jingkhawai shongkurim u Khun Langbrot u Blei. Pynlut bun shah sha ki kam leh isynei, ban ia kaba tei ingmane.