Shillong: Ka shnong Umsyiem kaba hap hapoh ka East Khasi Hills District, Pynursla Sub-division hynnin ka sngi 6th May 2020, hapoh ka jingialam jong U Rangbah Shnong bah Sanjeeb Kongwang lem bad ki nongkitkam shnong, ki la leit aiti jingiarap da ka cheque Rs. 25,000 sha u Additional Deputy Commissioner In-charge Pynursla Civil Sub-division, kum ka jingiarap kaba rit sha ka sorkar jylla lyngba ka Chief Minister Covid-19 Relief Fund ban ia khun pyrshah ia u khniang jingpang Corona virus.
Ha kane kajuh ka sngi la ioh ruh ban ai jingiarap sngewbha shimet na U Rangbah Shnong ka Shnong Umsyiem bah Sanjeeb Kongwang da ka cheque Rs. 10,000 sha ka Chief Minister Covid-19 Relief Fund. Na ka liang U Additional Deputy Commissioner In-charge Pynursla Civil Sub-division U Bah D. Hynniewta u la pynpaw ka jingai khublei bad sngewnguh ia ka shnong Umsyiem hi baroh kawei bad kumjuh ruh ia U Rangbah Shnong kiba don ka mynsiem ban iarap bad kyrshan lem ia ka sorkar ha kum kane ka por.
Na ka liang ka Shnong Umsyiem lyngba U Rangbah Shnong ki pynpaw ia ka jingsngewnguh ia baroh ki nongsynshar shnong ki ba don hapoh ka jylla bad kumjuh ia ka sorkar jylla bad kyrpang ia U Chief Minister ba don burom Shri. Conrad Sangma bad ia U Deputy Chief Minister ba don burom Shri. Prestone Tynsong kiba la shim khia met bad mynsiem bad trei shitom ban ialeh pyrshah ia une u khniang jingpang COVID-19.
Phi don ban ong eiei?