Khliehriat: Ki sengbhalang bad ki seng Nongkhaii dewiong ha ri lum East Jaintia Hills mynta ka sngi ki la mih kyndit kynsan ban iakhih pyrshah halor ka jingailad ka sorkar jylla ia ki Company pynmih dewbilat kiba don ha East Jaintia Hill ban wan kit ia u Dewiong na Assam sha EJH.
Ki sengbhalang kiba kynthup ia ka JSM, HNYF, KSU bad ka Synjuk ki Rangbah Shnong ha ryngkat ki seng ki nongkhaii dewiong, ka ka Jaintia Amalgamated and Redressal Forum (JARF), Ka Jaintia Coal Miner and Dealer’s Association nalor kiwei kiwei kiba ym duna ia ka shispah ngut eiei ki la mih ha ryngkat ki placard bad ki jingrisa ban pynshah ia ka rai jong ka sorkar.
Ia kane ka jingiakhih la pynlong ha jan ka phyllaw u DC ka East Jaintia Hills haba ki nongialam kiba paw khmat jong ki sengbhalang bad ki seng ki nongkhaii dewiong kiba kynthup ia u MLA barim, ma Justine Dkhar, ki MDC barim kiba bat ruh mynta ia ka kam President ki Seng Nongkhaii kiba kynthup ia u ma Hambertus Nongtdu, ma Helping Phawa bad u ma Joinriwel Pyrtuh ha ryngkat u President ka Synjuk ki Rangbah Shnong u ma Satly S Ryngkhlem.
“Ngi la dep ban phah ia ka jingthoh halor kane sha u DC ka East Jaintia Hills ban dawa ba dei ban weng noh ia katei ka hukum, hynrei namar ba ka sorkar kam sngap ki la pynlong noh da ka jingiakhih mynta ka sngi”, la ong u President ka JSM, u ma Lening Dkhar.
Na ka liang u President ka JARF, u ma Helping Phawa u la ong ba hadien ka jingiakhih kaba la neh kumta shi kynta shiteng eiei na ka liang u DC u la khot ban iakren ia ki nongialam kiba la jied 10 ngut, Ha kane ka jingiakren la donlang u DC ka District u bah FM Dopth, u ADC, bah SS Syiemlieh bad u SP ka District u Vivekanand Rathore Singh.
Na ka liang ki sengbhalang bad Seng Nongkhaii ha ryngkat ka Synjuk ki Rangbah Shnong ki la rai ban ieng rangbah ban pyrshah ia katei ka jingiohlad ki cement plant ban wanrah dewiong na sha Assam.
Na ka liang u DC u la kular ban phah sangeh noh ia kane ka jingwankit dewiong kitei ki kharkhana na Assam hynrei u la kyntu pat ia ki nongialam ba kin ailad ia ki kharkhana ban pynpoi tang ia uto u dewiong ba la don mynta ha shiteng lynti,
Na ka liang ki nongialam seng ruh ki la mynjur ia kane. “Ngi la pdiang ia kane bad naduh lashai ka sngi pat kum ban ai ka jingiatreilang bad ka bor District kaba la kular ban phah sangeh ngi ruh ngi buh ia ki volunteer bad ki VDP shnong ban peitngor ia kane ka jingwan rah dewiong ki Company Dewbilat na sha bar jylla”, la ong u ma Helping Phawa.
Phi don ban ong eiei?