New Delhi: Ka sorkar India, ka la kyntiew ia ka excise duty jong ka petrol sha ka T.13 shi litar, katba ia ka diesel sha ka T.10 shi litar bad lyngba katei ka khajna, kaba dang shu kyntiew mynta ka sngi, ka India, kan dei ka Ri, kaba oh ia ka khajna kaba heh duh na ka petrol, diesel ha kylleng ka pyrthei.
Ka sorkar India, ka la pynmih ia ka hukum ha ka Lah Sngi U Blei, ban kyntiew ia ka khajna surok ha ka petrol bad diesel da T.8 shi litar, nangta la kyntiew sa ka excise duty da T.2 shi litar ha ka petrol bad T.5 ia ka diesel.
Ka kotkhubor jong ka Business Today, ka kam ba kane ka jing oh khajna, kan long kaba heh tam ha ka pyrthei. La iathuh shuh shuh ba katei ka jing shim khajna, kan nym ktah satia na ki nongthied khutia ia ka umphniang petrol, diesel, hynrei katei ka khajna, ka dei kaba la shim beit beit na ki nong shalan ia kitei ki mar sha India.
Katei ka khubor, ka ong shuh shuh ba ka dor jong ka petrol mynta ha Delhi, ka long T.71.26 shi litar, kaba kynthup ia ka khajna kaba T.49.42 shi litar, katba ka diesel, ka shongdor T.69.39 shi litar, katba ka khajna ka long T.48.09 shi litar bad haba khein ia ka excise duty ia ka petrol bad ka diesel, ka long 69 percent.
Ka Italy, ka wan ba ar ha ka jing oh khajna, da 64 percent, ka France bad ka Germany da 63 per cent, 62 per cent ha Britain, 53 per cent ha Spain, 47 per cent ha Japan, 33 per cent ha Canada bad 19 per cent ha US.
Phi don ban ong eiei?