Rev B.P.Pohsngap
Kum ki Shakri barit jong U Trai ngin nym man thait ban kren bad ban iaipynkynmaw ia ka ktien jong U Blei. Kane ka long ka kam jong kita kiba U la khot sha ka kam jong U. Nalor ka jingim kaba ngi dei ban im, ban long sakhi ia kiwei, ngi dei ruh ban kren ban im kumba ngi kren. Ka pyrthei, ka mut ki briew ki peit, ki bishar ia ngi kum ki nongtrei ne Nongsharai, ngi long ne em ka nuksa, ha kiei kiei baroh jong ka jingim. Kiba ieit ban pule, kiba ieit ban sngap, kin nym man thait, namar ki long ka jingbam ba kynja mynsiem, ka ban tei ia ka jinglong Khristan ba shisha.
Mynta ha kane ka por, ngin ia kren bad ia syllok shaphang – Ka jingbymngeit ia ka ktien, kaba wan na U Blei, ia kaba U la thmu na bymjukut, ban pyndep Katkum ka iia kaba la U la thmu ban pyndep. Ngin pynshong nongrim ia kane ka khubor na ka Gospel Katkum U Lukas ka Lynnong kaba nyngkong, ka dkhot kaba 20. Ki ktien kiba ong kumne, “kumne ba mem shym la ngeit ia ki ktien jong nga, ia kiba yn pyndep ha ka iia jong ki”. Kane ka jingbymngeit, ka jia ha uwei u briew uba kyrteng u Zacharaiah. Tang ban tip katto katne shaphang u zacharaiah. Ka ktien Zacharaiah – ka mut ba la pynkynmaw da u Jehobah, U Blei ba donbor halor baroh. U Zacharaiah u long u lyngdoh ha ka por u Herod u syiem Judia, uba long ruh u tnga jong ka Elisabet na ki khun kynthei u Aaron.
Kine baroh arngut, ki long ki briew kiba hok ha khmat U Blei, ba ki da iaid ha ki hukum bad ki niam jong U Trai baroh khlem jingrem”. Luk 1:6. Kine ki briew kim don khun bad ka rta kaba la noh arsut, bad kim don shuh ka jingkyrmen ban dang ioh khun. U Blei Katkum ka jingthmu jong U, U la thmu lypa na bymjukut ban ai khun ia ki ynda haba ki la duh jingkyrmen. Ha kata ka iia, ba la thmu U Blei ban pyndep U la phah ia u Angel Gabriel, ban ong ha u “wat sheptieng, la shah shkor ia ki jingduwai jong Me; men sa ioh khun shynrang bad men khot kyrteng ia u , U Ioannis”. U Zacharaiah u la ong ha uta u Angel, da kumno ngan ioh tip ia kane? Naba nga long u tymmen, ki sngi ka rta ka tnga jong nga ki la noh arsut”. U Gabriel u la ong ha u, “ Nga long u Gabriel uba ieng ha khmat U Blei, te la phah ia nga ban kren ha Me, bad ban wallam ruh ia kane ka khubor babha”. Te ha khmih, namar ba mem shym la ngeit ia ki ktien jong nga, ia kiba yn pyndep ha ka iia jong ki” men sngap jar; bad men nym lah ban kren tad ynda kata ka sngi ba yn pynlong ia kine kiei kiei ruh”. Naduh kata ka por u Zacharaiah um nang shuh ban kren, bad haba u la mih sha uta u paitbah, u la pynpaw da ka kti namar um lah shuh ban kren, kane ka jingjia lymda dei kaba la thmu na bymjukut haba don ka jingbymngeit, ka lah ban duh noh. Hynrei namar kaba la thmu hi U Blei U la pyndep noh ia ka. Na kane ka jingjia, ngi iohi ia ka khubor kaba khraw haduh katta katta, ka khubor ia ki bym ngeit ia ka ktien U Blei. Ha ka jingbymngeit ka wallam ia ka jingbitar jong U Blei. Ka khubor lyngba ki rta, naduh ki nongiathuhlypa haduh mynta, U Blei U dang kren bad u dang iai pynkynmaw, dei lyngba ki briew jong U kiba U la khot sha ka kam jong U. Ha ki por hyndai, bunsien U Blei U kren lyngba ki Angel jong U, ne ki nongiathuhlypa, hynrei mynta da ka ktien jong U hi, kaba la long ka Nongiathuhlypa kaba khraw ryngkat U Mynsiem U Blei hi.
Ka khubor ka jingbymngeit, ka neh hi ka jingbymngeit, kan nym kylla da lei lei ruh, lada ngi long ki bym ngeit ban ai ka jingpynshitom ia ki bym ngeit.
Ha shuwa ba pynkut ia kane ka khubor, kum ka jingpynkynmaw, ia ka khubor kat ki bym ngeit, yn pynshitom, yn pynrem, wat haduh ha dwar U Blei. Ka juk kaba ngi im mynta, imat kan kham sniew ban ia kaba mynshuwa, ka long kumba ong U Jisu Mat 24:37. “Te kumba la long ki sngi U Noah, kumta ruh kan long kata ka jingwan u khun u briew”. Ka dak jong ka jingkut kaba la nang hajan hajan, ka dei ka jingbymngeit, jong ki briew ia U. Kum ka khubor jingpynkynmaw, ha ka por U Lot ruh ka jia, haba ki Angel ki wan ha shnong bad ha ing U Lot, ki la iohi ia ka jingsniew bad ka jingrunar ki briew bad ki Angel ki la ong ia U Lot, “ Me dang don shuh kino kino ruh hangne? Bad ha kane ka nongbah? Kiba dei kiba ha ing jong Me, to ialam ia ki shabar kane ka nongbah”. U Lot u la kynmaw ia ki pyrsa kurim bad u la leit khot ia ki. Kine ki ktien kiba u la kren ha ki “Jen 19:14. “To phin khie joit, to da wan noh na kane ka jaka, naba U Trai Un sa pynduh noh thiaw ia kane ka nongbah, Hynrei ha khmat la ki pyrsa kurim, u la imat kum uba kren biria”. Kane ka dei ka daw kaba ki la duh noh ia ka jingim, ki la iap lang ha kata ka jingpynjot U Blei ia ka Sodom bad kommora. U Juh U Blei Uba dap da ka jingbitar ia ki bym ngeit, ia ki bym Kohnguh, mynta ruh Un nym kylla, kat ia ki bym ngeit, ka jingbitar kan long halor jong ki. Ka Gospel Katkum U Ioannis 3:18, “Uta Uba ngeit ha U yn ym pynrem; hynrei Uta U bym ngeit u la rem lypa, naba um shym la ngeit ha ka kyrteng U Khun U Blei Uba la kha marwei” Ioannis 3:36 “ Uta Uba ngeit ha u khun u don ka jingim bymjukut, Uta te u bym Kohnguh ia U Khun un nym iohi ia ka jingim, hynrei ka jingbitar jong U Blei ka iai sah halor jong U”. Paralok baroh kynthei bad shynrang, to ngin puson , to ngin pyrkhat, kane ka long ka khubor ia phi ia nga, ngi long kumno, to ngin nym long kum kita, ki bym Kohnguh, ki bym ngeit, khnang ba ngin nym ngat ha ka jingpynjot ba triem U Blei. Kane ka dei ka jingmaham kaba ka ktien U Blei; ka kren, bad kan nym bakla ei ei, hooid, ha ka longbriew manbriew kin don beit hi ki ba nym ngeit, kiban nym pdiang, wat ha ka por U Jisu Khrist ba U dang don ryngkat ruh bad ki synran, don shibun ki bym ngeit, ki bym pdiang bad ki bym Kohnguh, na kata ka daw ka don ka ktien JINGBYMNGEIT. Nga iathuh ia phi lok baieit ia kaba U Blei U la thmu yn pyndep beit ia kita baroh, Katkum ki iia ba U la thmu hi, ym don ba lah ban khang. Lada ka dei iano iano ban kyndit bynriew, dei ban kyndit haba ka jingaiei ka dang plié. U Jisu U la dep ai ka pharshi ki thei sotti ba bieit san ngut, kiba leh sting ia la ka jingim khlem pynkhreh kumba dei ban pynkhreh ki la duh ban rung sha ka jingkhawai U Khun U Blei, bad haba ki la tied jingkhang dier por, U la ong ha ki, “Shisha nga ong ha phi, ngam ithuh ia phi”, ka long kaba sngew shyrkhei ban shah kyntait ha khyrdop ka bymjukut bymjukut. U Jisu Mat 25:13, “ Namar kata to sharai, naba phim tip lymne ia ka sngi, lymne ia ka por, ha kaba U wan U khun U briew (U Jisu Khrist). Ka la don ka jingrwai shem mynsiem kaba la thoh la shna da I Bah Harrison Roy, No. 295 JSM. Une u Nongthaw jingrwai u la iathuhlypa kumne,
“kin leit phar ki bym ngeit, sha ding ka bym ju lip,
Nga ruh shisha ngan leit, lada ngam shym la tip,
Kho:- “ Ba uei uei baroh Uba ngeit ha U ,
Un nym jot shuh, Un ioh ka jingim bymjukut”.
(Ia kane ka dkhot u la shim na ka Gospel u Ioannis 3:16)
“Trai beh noh jingbymngeit, na dohnud bad jinglong,
Kum khynnah ai ngan ngeit, ngan kohnguh ktien ba ong.
Na ka bynta ka burom jong U Blei hi .. AMEN………..
Phi don ban ong eiei?