Ka jingkiew dor ki marbam

Bah RM Shabong

Ka sorkar Jylla, ha kine ki sngi, ka dumok tyngeh ia kito kiba pynkiew dor ia ki marbam mardih bad haba sngap ia kitei ki kyntien bad ka jinglong ka juk ha kine ki sngi, ka pynlong pynban ban kum ia rkhie sammut bad ka daw, ka long ba ka ktien bad ka kam, kim iahap dor eiei satia.

Hynrei ha kano ka dur, kan iahap ha ki kam, haba naduh na Shillong, ka mar ka la remdor lypa bad lada phi leit ha man ki dukan jong ki mahajon heh, ym iohi satia ia uwei ruh u ban thoh ia ka dor jong ki dor ki mur bad kam dei tang katta, hynrei la khynniat beit ia shi jait ka mar bad shi dor, ia ka dor jong kata ka mar bad u paidbah, uba ia knieh mar, um don por satia ban ia khlieh dor bad katei ka dei kaba jia shwa ha ki mahajon heh ha Iew Mawlong bad kiba die ruh pyllein pyllein ha khmat ki pulit bad ki magistrate.

Ha kine ki sngi, ban wad kali, kam dei kaba suk, ban ioh korphiw pass, kam dei kaba suk, ban wad daju kam dei kaba suk, ban wad draibar kam dei kaba suk bad kaba kongsan ka long ba ban pynbiang mar ruh kam dei satia kaba suk, namar ba ka jing dawa ka long kaba bun, katba ka jing poi ki mar bam mar dih, ka long kaba duna shi katdei bad haba ka long kumta, ka ain jong ka economics ka trei kam bha, ba ka ju don ka jingkiew dor ki mar ki mata, haba ka jur ka jingthied bad ka duna ka jing don ki mar ha dukan.

Haduh mynta ka sorkar Jylla, kam pat nud satia ban kem ia uwei ne kawei ruh, kiba pynkhein ain, da kaba pynkiew dor ia ki mar ki mata bad lada ka long kumta, ka pyni ba ki jingkren, ki long tang da ki tynghung bad ki bym don bor eiei ha ki kam bad la kynmaw ruh ba ka mih sa kawei ka jingkren, na ka Deputy Commissioner, East Khasi Hills, kaba ong ban ia shondur ia kitei ki dukan bad katei ruh ka dei ka ktien pyllait jynhaw, ka bym iahap satia, la kumba ym don ki nongtrei ka Supply Department.

Ha kaba kum kane ka saw ka sian, ka la dei namarkata ia ka sorkar Jylla, ba kan siew nokot ia ka bai kitmar jong ki paidbah bad ia katei kam don jingeh, da kaba kan ia khate bad ki mahajon heh ha Iewduh bad nangta ba kan don ruh la ki jong ki pulit ki ban thep bad pynhap mar bad wat ki kali ban pynpoi mar sha ki jaka ba donkam bad katei lehse, kan khanglad ia ka jingkiew dor ki mar ba kongsan.