Ym don jing thmu ka sorkar ban plie ia ki jaka pule: Prestone Tynsong

Shillong:U symbud myntri rangbah ka jylla u bah Prestone Tynsong mynta ka sngi u la ong ba ka sorkar Meghalaya kam pat don rai ban plie iaki jaka pule hapoh ka jylla.

U bah Prestone Tynsong u la ong ba ka sorkar kynthup ia ka tnat pule puthi ka jylla kam pat lah ban shim iaka rai namar ka sorkar India kala pynbna ban pynjari iaka jing pakhang shnong lane ka ‘Lockdown’ ha baroh ka ri India haduh 17 tarik jymmang 2020.

“Namar ba ka sorkar India kala pynjari biang iaka jing pakhang shnong lane ka ‘Lockdown’ ha baroh ka ri India haduh 17 tarik jymmang 2020, ka sorkar Meghalaya kam pat don ka jing thmu ban plie biang iaki jaka pule hapoh ka jylla” la bynrap u bah Prestone Tynsong.
Kumban shu pynkynmaw dang shen ka KSU, FKJGP, HNYF lem bad kiwei ki riew paidbah ba trei mon sngewbha ki la kyntu iaka sorkar Meghalaya ba kam dei ban kyrkieh ban plie biang iaki jaka pule hapoh ka jylla kum shi bynta ban tehlakam iaka jing pur ka jing pang ‘corona virus’ hapoh ka jylla.
U symbud myntri rangbah ka jylla u bah Prestone Tynsong u la ong ruh ba naka liang u myntri ka tnat pule puthi ka jylla u bah Lahkmen Rymbui lem bad ki ophisar ka tnat pule ka jylla ki dang wad ki lad ki lynti kumno ban sdang plie biang iaki jaka pule hapoh ka jylla ryngkat ka jing iatreilang bad ki nong pyniaid skul lane ki School Managing Committees (SMC).