Tynrong lem ka Synjuk ki Nongniah Sumo ia ka jingeh ki draibar kiba don ha ka synjuk

Nongpoh: Ka kynhun ki nongniah kaba la tip kum ka Nongpoh Sumo Owner’s & Driver Association (NSODA), hynnin ka sngi ki la pynlong ia ka jingsam marbam sha baroh ki draibar kiba don hapoh ka synjuk jong ki.

Katei ka synjuk (NSODA) jong ki nongniah sumo ha Ri Bhoi, ka don haduh lai tylli ki Unit, kata ka Mawhati, Umsning bad Nongpoh, ha kaba ki la sam sha baroh ki nongniah sumo kiba don ha la ki jong ki Unit bad kiba la sam da ki mar bam kiba long kum u Khaw, Phan bad u Dai, khnang ba ki nongniah sumo, kin ioh ban bam ha kaba kum kane ka por ba don kane ka pakhang shnong bad maki kum ki nongniah sumo, kim ioh ban mih surok ne ban leit kamai.

U President ka NSODA, Bah Kyrshanlang Jyrwa, u la ong ba ka nongrim kaba la pynlong ia ki kum ki nongialam ka synjuk, ba kin shim ia katei ka sienjam ban sam mar bam sha baroh ki nongniah sumo, ka long ban iarap ia kito ki draibar kiba la iakynduh jingeh ha kaba kum kane ka por ba don ka pakhang shnong.