Shah kem 5 ngut ki HYC, lait shiteng kynta

Shillong,11Nailur:
Saw ngut ki dkhot ka Hynniewtrep Youth People ( HYC) kiba la shah kem namar ka jingkynnoh ba ki la leit theh petrol khlem siew pisa na Anjalee Petrol Pump ki la lait noh mynta ka sngi bad ha katei ka por ki dkhot jong katei ka seng kiba don san kali ki la leit ban pdiang sngewbha ia kitei ki dkhot ba dang shu lait phatok ryngkat ka risa ka kynhoi bad ki pyrta ia ka Motto ka seng kaba ong ‘Tur shaphrang shipai ka ri’, hynrei tang khyndiat minit hadien ba kitei ki saw ngut ki la lait sa san ngut pat ki la shah kem, bad la kem ia ki na Umsohsun da ka jingkynnoh ba ki dei ki briew kiba la wan pynthut bad wan tuklar ia ka jingkhynra nongdie madan ka Municipal ha Jail Road.
Haba ia kren bad u Vice president katei ka seng u samla Donboklang Kharlyngdoh u la iathuh ba tang hadien shiteng kynta eiei, ki pulit ki la pyllait noh ia ki hadien ba ki la lap ba kim dei kiba donkti ha katei ka kam, bad ka dei tang ka jingbakla u Majistor ba ialam ia katei ka jingleit khynra, iathuh u samla Donbok.