Jowai:U Chief Executive Member ka JHADC, u ma Thombor Shiwat u la khot jingialang kyrkieh mynta ka sngi kaba la tip kum ka joint party meeting na ka bynta ban iakren halor ka jingbym ioh tulop ki nongtrei ka council la 7 bnai kynthih bad ruh halor ka rai jong ki nongtrei ban iakhih da kaba sangeh leit trei lada ka EC kam lah ban siew ia ka tulop jong ki.
Ha kane ka jingialang la wan ban ia shim bynta da u Dy. CEM, Lasky Rymbai, Wining Garland Sungoh, Phasmoon Dkhar, Brightstar Bareh, Saron Pasweth, u MDC shu thung u ma Octomewat Lamin nalor kiwei de ki dkhot ka liang synshar.
U ma Thombor Shiwat, CEM ka JHADC u la iathuh ba ka Executive Committee ka dap da ka jingsngewkhia shi katdei eh halor ka jingbym ioh tulop ki nongtrei jong ka Council, hynrei wat la katta ruh u la ong ba kin sa ioh ia ka tulop ynda ka sorkar ka la pyllait ia ka pisa jong ka Council.
“Ngi sngewthuh ia ka jingeh jong ki staff jong ngi hynrei nga kyntu ia ki ban iai shah bad ngi. Wat tieng phin sa ioh hi ia ka tulop jong phi” la ong u ma Thombor.
U ma THombor u la iathuh ba ka JHADC ka dang don ka pisa kumba 100 klur eiei ka ban ioh na ka sorkar jylla kaba dei ka bhah jong ka Council kaba la lum na ki khajna dewiong bad kiwei kiwei ki mar pohkhyndew. Katei ka 100 klur ka kynthup ia ka 81 lakh tam ka bhah na khajna dewiong bad 16 lakh tam pat ka khajna na kiwei de ki mar pohkhyndew kynthup ia u mawshun.
U la ong lada ka sorkar ka pyllait noh kloi ia katei ka pisa, ka Council kan siew noh hi mar mar ia ka tulop jong ki nongtrei. U la iathuh ruh ba ha ka jingshisha la dep ban buh sngi ban ia kynduh ia u myntri rangbah halor kane ka jingeh jong ka Council ban siew tulop ia ki nongtrei hynrei namar ka jingsaphriang u Khniang Covid 19 ka la sahteng noh bad u la khmih lynti ba ha kine ki khyndiat sngi kin ioh ka lad ban iakren bad ka sorkar.
Kumba shu pynkynmaw ba ka JHADC ka don kumba 2000 ngut k nongtrei bad tang na ka bynta ka tulop ka shongdor haduh 6 klur eiei ha ka shi bnai.
Kane ka jingialang ba kyrkieh la lum mynta ka sngi ka long halor ka jingiakhih ki nongtrei ka Council hynnin ka sngi bad ka rai jong ki ban sangeh treikam lada ka EC kam lah ban siew ia ka tulop jong ki.
Phi don ban ong eiei?