Sha U MR, phah dorkhas u MLA ka Nongpoh halor ka jingplie ia ki jaka pule

Nongpoh:Hynnin ka sngi u Bah Mayral Born Syiem, MLA ka Nongpoh, u la phah dorkhas sha u Myntri Rangbah ka jylla, u Conrad K. Sangma, kaba long ruh kum ka jingai jingmut sha ka sorkar jylla, ba ia mynta hi ym pat long ban plie ia ki jaka pule, ki Iew ne ia kino kino ki jingialum paidbah, khnang ban iada na ka jingsaphriang jong u khniang jingpang Corona Virus ne u COVID-19.

Lyngba katei ka Dorkhas kaba u MLA ka Nongpoh, u la phah sha u Myntri Rangbah, la pynpaw ba na ka liang jong u hi kum u Nongmihkhmat paidbah, u sngewdei ba ia kaba mynta hi ym pat long ban plie ia baroh ki jaka pule hapoh ka jylla, namar kumba ka long mynta hi kam pat da long shngain na bynta ki khynnah skul bad kmie ki kpa, lada plie ia ki skul, ha kaba u la pynpaw ruh ba la kumno kumno yn plie tad ha shiteng u Bnai Jylliew, kata ruh hap da bishar shwa ia ka jinglong jingman jong u COVID-19.

Ha katei ka Dorkhas, u MLA ka Nongpoh, u la pynpaw ruh ba shwa ban plie ia ki skul ne ki jaka pule, la dei ban pynbiang shwa ia ki jingdonkam kiba long kum ki jingda durkhmat, ki sabon saitkti bad ruh la dei ban pynbiang wat ia ka Social distancing, ha baroh ki jaka pule, khnang ba kan iada na ka jingsaphriang u COVID-19.