YM ĪAP BAD YM BIEJ WAT LADA YM PYNLONG SKUL SHI SNEM!

Bah Francis Syiemlieh

Katba baroh ki skul ha ka jylla kim pat khohreh ne kyrkieh eiei ban pynlong skul noh bad ba ki dang ap peitthuh artad artad da ka jingsngewtieng īa ka jinglong jingman bakhim shitom (grim situation) kaba la wanrah da kane ka Khlam COVID-19, pynban nga la īoh jingtip ba kadon kawei ka skul hangne ha Rilum jongngi īa kaba, na ka bynta ka burom jongka, ngam kwah ban pynpaw kyrteng, kala kyrkieh palat ban pynlong skul noh wat haba tang kane ka Lockdown kaba la pynjari da ka Sorkar Pdeng ruh kam pat kut. Ha kaba īadei bad kane, katei ka skul la sngewthuh ba kala thoh shithi sha u/ka Deputy Commissioner jong kata ka district ban pan jingbit na uta/kata ka Deputy Commissioner ban shah īa katei ka skul ban pynlong skul noh, puluiñ! khlem jingpyrkhat jngai eiei īa kane ka jingma kaba la-ap lypa. Lah ruh ban sngewthuh ba īa kata ka shithi la īasoi ne signed lang da ki bor jong ka skul bad da bun phew-ngut (ymtip katno ngut?) ki kmie ki kpa jong ki khynnah skul jong katei ka skul.

Ka pynlyngngoh shikatdei eh ban pyrkhat tip ha kano ka rukom tip ba ki kmie ki kpa kila leit kylla long ñiangkohnguh beit ha ki bor jong katei ka skul kat haduh ba kin da shu saiñ ne soi beit īa katei ka shithi khlem da lah ne īohlad ban pyni daw eiei lem!

Kaba pynlyngngoh shuhshuh kalong ba, kumno katei ka skul ka nud ban khot jingīalang ne meeting īa ki kmie ki kpa jong ki khynnah skul jongka wat haba ka kyndon-aiñ (protocol) jong ka Lockdown kaba ong shai ba ‘ymshah īano īano ban īalum ha kano kano ka jaka palat īa ka 5 ngut briew’ kadang treikam.

Hato katei ka skul kam don jingtip seh shaphang jong kane? Tip mano ruh īoh lehse katei ka skul kala pynkheiñ wat īa ka protocol jong ka Social Distancing haba kala khot meeting īa ki kmie ki kpa (parents) ban īoh īa ka jingsoi (signature) jongki ha katei ka shithi jongka. Lada katei ka skul ka khlem khot meeting shuwa īa ki kmie ki kpa, tharai kumno kalah ban long ba kin soi ha katei ka shithi sha u/ka D.C. (intended letter to the D.C. concerned)? Lada ki kmie ki kpa ruh kila leit sha ka meeting bala pynlong da ki bor jong katei ka skul, ka pyni ba maki ruh kila pynkheiñ īa ki hukum jong ka Sorkar halor ka Lockdown bad ka curfew bad kumta kidei ban shah kylli jingkylli ha ki Pulit katkum ki kyndon jong ka aiñ. Kalong kaba shongnia ruh ban kylli ba, lada ki bor jong katei ka skul kila phah soi ne phah sign īa ki kmie ki kpa ha katei ka shithi ne application, ki donkam ban shah tohkit ha ki pulit ba da kano ka rukom ne ka lynti kila īoh īa ka jingsoi ne signature jong ki kmie ki kpa, īoh haleh ka skul kala pyndonkam da ka lynti kabym īahap, kum da kaba shu pynbor pyrshah īa ka mon jongki (made to sign under pressure/compulsion against their willingness).

Katkum na ki khubor kiba ngi īoh na kasngi sha kasngi la ong ba kane ka Khlam ka ktah kloi bha īa ki khynnah kiba dang kham rit ka rta bad īa kito ki rangbah kiba lakot īa ka 60 snem shajrong bad la-ong ruh ba ngi dei ban sumar bha īa kine arjait ki briew. Haba kumne, hato katei ka skul kam buh īa ki khynnah skul lajong ha ka jingma bad ruh, īa ki bahaīieng-hasem jongki bad īa ka imlang-sahlang hi baroh kawei? Lane, hato katei ka skul ka don jingkitkhlieh ne jingtieng eiei īa kane ka jingma, īohba lehse bun na ki khynnah skul jongka kin ngat ha kane ka Khlam bashyrkhei? Hato ka lahbiang īa kane ka skul ba kan pyrkhat tang īa ka jingpyndep īa ki course lajong jongka? Kan myntoi aīu kata ka jingpyndep course lada ki briew pat ki dang īap bad ki dang lut na ka pyrthei? Hato seh kalong kaba dei ba ngin īabeh īa ka jingstad da kaba knia noh īala kijong ki khun ha kane ka Khlam bashyrkhei ne ha kano kano ka bor bakhyllah? Īa kaban lei pat ba ngi īoh khun? Hato seh ka kham kordor kane ka CORRUPT COMMODIFIED EDUCATION SYSTEM (kaba la kylla long tang ka kam jingīakhaīi) ban īa ki khun jongngi kiba ngi don? Ne, hato don ki briew kiba enjoy ne kibym sngeweiei ban īohi īa ki briew kiba īap ha kane ka Khlam ne ha kano kano ruh kawei pat ka bor bakynsha? Lada kidon, kin dei tang kito ki briew kiba don jingīadei eiei bad ka bor ksuidtan aīu aīu (Satanic element) hi.
Kaei kaba pynīohi na kane kalong ba, imat katei ka skul kam ju salia ban wad jingtip shaphang jong kane ka Khlam COVID-19 kumno ka ktah īa ki briew bad haduh katno ngut kala bam īa ki briew ha ka pyrthei, lane ba kam ju patiaw ban pule īa ki kotkhubor ban īoh jingtip shaphang ki hukum kiba ka sorkar ka pynjari na kapor sha kapor, khnang ban īalehpyrshah īa kane ka Khlam bam briew bad kumta ka sah beit kum kabym don jingtip eiei (ignorant), la kadei shaphang jong kane ka Khlam ne shaphang jong ki hukum kiba ka sorkar pynjari; bad kane kadei ka kam-biej ha ka liang jong katei ka skul. Imat ruh katei ka skul kam tip eiei ba ka Jylla baroh kawei kadang īai īakren halor ka jingdonkam ba ka Sorkar Jylla kam pat dei ba leh kyrkieh ban phah plie noh īa ki skul, wat hadien jong ka Lockdown, halor ka jingpynshongnongrim (contemplation) īohba ba kane ka Khlam kan dang khiekhlieh thymmai biang. Ban da kadei ba katei ka skul kala buddien ne wad jingtip tista bha shaphang jong kane ka Khlam, kan ym jin da la kyrkieh ban thoh īa katei ka shithi sha uta ne sha kata ka D.C., pynban kala dei ban ap shuwa da ka jingīaishah tad haduh ynda ba ka Sorkar Jylla kala pynmih īa ki hukum (order) ne ki jingbthah (instruction) kiba biang ban pyni ba kala shngaiñ ban plie noh īa ki skul baroh. Imat katei ka skul kam salia shisha wat lada ki khynnah skul jongka kin īohkem īa kane ka jingpang Khlam bad ba kin long ruh kum ki nongpynphriang īa kane ka Khlam sha kiwei pat ha katei ka district bad wat ha ka Jylla baroh kawei ruh. Ka jingkwah jong katei ka skul ban pynlong skul noh dang hala mynta haba baroh ki aiñ-tyngkan ne leh-adkar (protocol) kidang don hala ki jaka jongki (dang pynjari īaki) kalong kaei kaei kaba pynsngewlong thamula (silly) ban pyrkhat bad kam dei ban īoh jingpynksan (justification) halor kane ka phang namar ngim tip lano bad naei kane ka Khlam kan wan ban kyrtoh īangi. Namarkata, ki D.C. kiba dei peit īa katei ka district kim dei satia ban ai jingbit īa katei ka skul ba kan plie noh dang hala mynta.
Da kane, nga shim īa ka lad ban īasam-jingmut lem bad baroh maphi kiba īoh pule īa kane ka article bad īaphi ruh ki bor skul kiba don ha kane ka Jylla ba phim dei ban long kiba khim mynsiem bad kiba lyngkot jingmut jingpyrkhat ban īohi tang īa ka pisa bad īa ka jingpyndep noh ‘course’ lajong lajong kiba don ne kiba dei īa une u snem uba mynta (2020) uban sa leit noh sha ka īawpaw (oblivion) sa tang katto katne bnai. Kan myntoi aīu keiñ kata ka jingkwah pyndep ‘course’ noh jongphi lada phin duhnoh pat, ha kane ka Khlam bashyrkhei, īa kito ki khynnah skul baieit jongphi na kiba phi ju īoh īa ka nam bad ka burom jongphi kum ki nongpynīaid skul bakhraw bad kum ki nonghikai skul badonburom? Kan myntoi aīu ruh ba phin īoh īa kata ka pisa ne ka scheme ne ka fund ne kano kano kawei pat ka snap pisa-tyngka kaba phi la ap khmihlynti ban īoh hynrei phi duh noh pat īa kito ki khlur jong ka lawei, ha kapor ba ki dang sdang ban khie-ih bha, kiba dei ban wanrah nam wanrah burom īa ka skul jongphi bad īa ka Jaitbynriew hi baroh kawei? Katno leilei kan long kaba pynpangnud haduh katta katta lada ngin duh noh īa kito ki ‘Little angels’ baluilui, kibym pat sngewthuh eiei ruh em kamut aīu kata ka Khlam īaki! Lada kine kin īap noh khlem pat dei por, tang na kadaw jong ka jingkwah burom palat jongphi, hato phin nym kitpop hakhmat u Blei? Kum ki nongpynīaid skul bastad bad kum ki nonghikai skul bashemphang kiba kham tip īa ka dor jong ka jingim-briew, phi dei ban long kiba pyrkhat kylluid-mynsiem bad kiba īar jingmut-jingpyrkhat ban īohi ba ka jingim jong ki khynnah skul baieit jongphi bad ki khun baieit jongngi kalong kaba shngaiñ (safe) bad kaba lait na kino kino ki jingpynrit-mynsiem (free from fear) kum na kane ka Khlam ne wat na kane ka Corrupt and Commodified Education System ruh. Lada ngin duh noh īa une u snem-Khlam (Pandemic year) ruh, kin dang don shibun bah da kiwei pat ki snem kiban dang īai wan bad kiban dang īai tyllun na ki thiar jong ka bymjukut jong u Blei, te ngim duhnong eiei ruh em. Kaei kaba donkam eh mynta kalong ba ngin lait noh shuwa na kane ka Khlam bakhyllah jingtriem, khlem da duh-ei shuh wat tang īa kawei ruh ka jingim bakordor jong ki baieit bathoiñ jongngi ha ka bor jong kane ka Khlam. Ha kajuh kapor ngi dei ban long kiba la pynkhreh dohīap, wat lada ngin hap ban bam tang shisien shisngi tang ban im, na kadaw ba ka Sorkar ka hap ban shim īa ki mawjam kiba eh (stringent measures) ban jop īa kane ka Khlam, kum kaba pyntreikam īa ka Lockdown bad īa ka curfew ne kum kaba khate noh katto katne na ka tulop jongngi lane kum kaba pynhiardor noh īa ki mar die mar thied ha īew bad kiwei kiwei. Kaei ba ka Sorkar ka leh mynta kalong ban īohi īangi iwei-pa-iwei ba ngi lalait na kane ka mradkhlaw Coronavirus bad ba ngi dang im wat hadien ba kane ka Khlam kala leit noh sha ka jingīap bymjukut jongka.
KA JINGKYRPAD NA UNE U NONGTHOH ARTICLE ĪA KA SORKAR:
Sorkar Badonburom,
Sngewbha wat nym pat pynlong skul kyrkieh shuwa īa mynta u snem, pyndonkam īa ka jingstad Logic jongphi- kham lah kaba duh īa u snem uban sa leit noh ne kham lah kaba duh īa ki soh ba dang khie dang san jong ka lawei (fertile products of the future)! Mano ba sngewbha ban īohi īa ki khun jongngi ba ki īap pangnud khlem pat dei por? (Who would love to see our children die a sadful undue death?). Wat kheiñsting (underestimate/overestimate) īa kane ka Khlam COVID-19 kaba rieh ha ka lyer bad kaba bam da ki briew (man eater Pandemic) namar ka lah ban wan kyrtoh biang ruh (possibility to relapse). Ka dang lung ne kloi eh palat kapor ban ong ba ngi lajan jop ne ba ngi lajop (it is too early to say that we are about to win or that we have won). Īa ka ding kaba la pluh dei ban tem bha ba kala lip jak, ba wat i symphliah-ding iba ritduh eh ruh dei ban īohi ba ila dep lip ne īap, lymkumta ka ding kan khie-im biang ha ka jingbeh ka lyer, bad kan pynjulor arshah.
Ka jingshisha ka sah, ba ki khun jongngi kin ym īap ne kin nym kylla biej noh wat lada yn khang īa ki skul baroh shisnem mynta u snem ruh; hynrei dei ban pynkiew klas beit īaki da kaba pynjari da ka Jingpyrkhat bakham kyrpang na ka bynta īabaroh ki khynnah jong ka skul (Extraordinary General Grace system should be considered). Katba īa ka jingminot jongki pat, khlempep, ngin sa īohi ha ka result jong u snem uban bud ynda haba kila shong ha ka klas kaba kham hajrong – kiba minot te kin pass beit, hynrei kibym minot te kin fail ne sah klas!
Uba burom,
U Nongthoh Article.