Ka Jylla Meghalaya ka la jop, la lah ban ong, wat lada dang sah iwei ba dang dei ban ioh ia ka report

Ka Jylla Meghalaya ka la jop la lah ban ong wat lada dang sah iwei ba dang dei ban ioh ia ka report. Kumta haba ia nujor bad kiwei ki Jylla bad khamtam ki Ri kylleng ka pyrthei, ka paw shai kdar ba u Blei U dang ibit ban pyllait ia ngi na kane ka khlam u niangkobid (Coronavirus), ryngkat ruh ka jingkohnguh ki paidbah ia ki jingbthah ka Sorkar; ka jingtrei shitom ka Sorkar naduh u Chief Minister haduh ki nongtreikam sorkar ha ki kyrdan bapher bapher bad khamtam ki Doctor ki Nurse bad ki staff kiba la aiti met bad mynsiem.

Hynrei ngim dei ban khein sting namar ha India bad Assam u dang don une u niangkobid (Coronavirus), ka jingpyrkhing ia ka rung ka mih jong ki briew kiba na bar Jylla te ka dang dei ban bteng. Ka shai kdar ba ka Inner Line Permit (ILP) ka long ka bym bit duh ia ki Jylla baroh ha North East. Ka Sorkar Meghalaya wat lada ka la thaw pynbha ia ka Meghalaya Residential Security and Safety Act, ka dei ban iai bteng ia ka jingdawa ia ka ILP na ka Sorkar India. Ki Seng Bhalang baroh ruh ki dei ban ieng tylli kham khlain shuh mynta ban pynioh ia ka ILP.

Ki nongbylla sngi kiba na bar Jylla katto, dei ban pynthikna ba kim dei ban ioh rung sha ka Jylla Meghalaya lada kim ioh shwa ia ka Labour Permit. Da u niangkobid ki la phet la bun, ka la long ka jingkyrkhu bym pat poi pyrkhat ia ngi, kumta, ki contractor bad kiwei kiwei kim dei shuh ban pynrung ia ki khlem da ioh ia ka Labour Permit na ka Sorkar Jylla.

Ngi kmen lang bad ka iing ka sem I (L) Dr. Sailo Ryntathiang kiba la iaid lyngba ka jingtynjuh bakhraw hynrei u Blei U la ri kyndong ia ki bad mynta ki la ioh biang ia ka jingkhiah, ryngkat ki ar ngut ki khynnah kiba ju trei bad ki, lem bad iwei ia paralok jong ki. Ngi kitbok ba kin lah ban plie noh kham kloi ia ka Bethany Hospital namar ka la ai bha ia ka jingshakri ia kiba bun na ngi bad ba ka nam kakyrteng I (L) Dr. John Sailo Ryntathiang kan iai sah.

Nga kyntu ia ka Sorkar ba lada long kaba lah ban nym ot ia ka tulop jong ki nongtrei sorkar namar baroh ngi la ia mad lang ia ka jingeh sa ka shah ot tulop kam sngew ia hap. Ka Patna High Court ka la rai kumto, kan bha ba ka Sorkar Meghalaya kan pyrkhat bha ia kane ka kam. Nga ai ka burom ia ki nongtrei sorkar kiba khlem pyrshah ia kane, hynrei ngi tip ba ka long kaba eh bha ia ki. Ka Sorkar kan peit bniah bha ia ka jingeh kiba duk ban siew bai skul, bad ha ka juh ka por ba ki nonghikai kin ym duh tulop pat.

Khadduh, ka jingkyntu ia kiba bun kiba la kylla kaba mut kin iai sah kumta, namar bunsien haba la jah ka jingtieng, ki leit phai biang sha ka jingim kaba mynshwa. Namar kane ka khlam ka long tang ka jingkyrsiew thiah ia ka jingshyrkhei kaba kham khraw kan ban jia.

Khublei,

H.S.Shylla, Ex-MLA