Katba ka Sorkar ka nangpynkhreh bha ia ki lad jingiada ban ialeh pyrshah ia ka ka jingsaphriang ka jingshyrkhei ka khlam Covid-19 hapoh ka jylla, naduh ka leit ka wan ki paidbah kim lah ban jam na ka wei ka jaka sha kawei pat ka jaka (District) khlem da ioh ki jingbit (Curfew Pass) na ki bor sorkar, khnang ban lah ban teh lakam ia u khniang jingpang Covid-19 ba un ym saphriang hapoh ka jylla.
Hynrei kaba phylla bad kaba ym lah ban mutdur pat ka long wat ha kum kane ka por ba ka sorkar ka dang pyrkhing bha ia ka leit ka wan ki paidbah, dang don bun pat ki briew kiba ioh ban rung ban mih beain na kawei ka jaka sha kawei ka jaka.
Ia kane la iohi shai ha ki ba bun ki jaka ha kaba ki bor ap pahara, naduh ki pulit, ki VDP shnong ba pher ba pher ki dang ia hap ban pahara bha ba ki briew ba kin ym ioh ban rung ban mih klumar ha kum kane ka por, hynrei watla ha ka jingpahara ba jur, ki dang paw tyngkrein pat ki kam ba ioh ban rung ban mih na kawei ka jaka sha kawei ka jaka khlem kano kano ka jingioh jingbit na ki bor Sorkar (District).
Dang mynhynnin 29 tarik April 2020, la iohi 58 ngut ki bar jylla naduh Khliehriat shaduh Byrni khlem kano kano ka jingioh jingbit na ki bor sorkar ki la ioh ban leit ban wan da kaba suk khlem kano kano ka jingshah bat ha ki jaka ap pahara (Check Gate) ba la buh da sorkar. Ka jingkylli long shano ki bor pahara na East Jaintia Hills? Balei kine ki 58 ngut ki bar jylla ki ioh ban mih naduh Jaintia shaduh Byrni khlem kano kano jingeh ia ki. Lada ka long kumne ka ap jingma kaba khraw ia ka jylla baroh kawei khamtam ha kum kane ka por mynta ba ka jingpang khlam ka dang kiew sted ha kylleng ka ri India.
Kumta ka sorkar ka dei ban tohkit lane peitngor bha ban pynkhlain ia kine ki jaka ap pahara ha kum kane ka por ba kan ym don kano kano ka jingma ia ka jylla khamtam eh ha ki jaka rung jaka mih (Exit point) kiba dei ban rung ban mih na kawei ka jylla sha kawei pat ka jylla. Namar ka jingiada jong ngi kan ym don jingmyntoi satia, lada ka tlot ki jaka pahara ha ki jaka rung jaka mih. Namar tang u wei u ba don ia kane ka jingpang (positive) un ioh ban rung beain ha ka jylla, ka jylla hi baroh kawei kan pluh kumba shah siat da u nukliar bom (Nuclear bomb). Kumta ka sorkar ka dei ban kyntu ia baroh ki bor pahara khamtam eh ha ki Exit point ban kin ym leh sting ia kane ka kam iap kam im u paidbah.
Scholar Lawriniang (Nongthliew WKH)
Kata kaba dei eh, ka sorkar mynta ka hap ban pyn khlain bha ia ki bor pahara
Nga ngeit ba na ka liang ki pulit hi te ki la pyrshang katba kot la ka bor,hynrei don kam ka jingiatreilang ki bor shnong bad ki paid nongshongshnong ruh namar ki don bun ki lad bad ki lynti ba ki briew ki lah ban leh beaiñ ia kano kano ka kam bym dei.