Iakhih ki nongtrei ka JHADC bym ioh tulop la 7 bnai

Jowai:Myn hynnin ka sngi, kyndit kyndit ki nongtrei ka Jaintia Hills Autonomous District Council (JHADC) ki la pynlong ia ka jingiakhih paidbah da kaba ia lumlang ha phyllaw katei ka Ophis treikam kum ka dak ban pyrshah ia ka jingbymlah satia ka Executive Committee kaba ialam da u ma Thombor Shiwat kum u CEM kam lah satia ban siew ia ka tulop jong ki la 7 bnai kynthih.

Namar ka lockdown, ki nongtrei ka JHADC ki la hap ban shongiing khop ha kine ki sngi hynrei ha kane ka sngi Balang la phah ia ki nongtrei ban wan trei hynrei kyndit ki la rai ban iakhih pyrshah ia ka EC.

Kitei ki nongtrei ka Council ki la rai ruh ban sangeh treikam khlempud lada ka JHADC kam lah ban siew tulop ia ki.
“Ka long kaei kaei kaba pynsngewdiaw ia ngi kum ki nongtrei kane ka District Council namar la 7 bnai ngim shym la ioh tulop satia bad ka la buh ia ngi ha ka jingeh kaba khraw ban bsa ne ban pynbiang ha iing ha sem”, la ong uwei na ki nongialam ki Staff jong ka JHADC.
“Ki nongbylla ki dang lah ban ioh jingiarap, mangi pat ym don ba iarap ha kum kane ka por ba jynjar na ka daw ka jingkhang shnong katba mangi pat la khein ba ngi ioh tulop man u bnai katba ka jingshisha ngi khlem ioh tulop shuh la 7 bnai bad bun ki nongtrei ki la hap ban kit ram ban pyndap ha iing hasem”, la bynrap uwei pat u nongtrei ka JHADC.
Na ka liang ka bor District haba la ioh jingtip halor kane ka jingiakhih ki nongtrei ka JHADC, ki pulit hapoh ka jingialam u SP, Lakador Syiem ki la leit mar mar sha katei ka jaka ban kyntu ia ki ba kim kiar na ka jingialum paidbah katkum ka jingbthah ka sorkar namar ka jingsaphriang u Kniang jingpang Covid 19.
Hadien kane ki nongtrei ka Council kum ki briew kiba sngewthuh ki la ia pra noh, hynrei ka jingiakhih jong ki kan iai bteng da kaba sangeh trei tad haduh ba kin da ioh ia ka Tulop jong ki.
Ha kaba iadei bad ka Seng ki Nongtrei ka JHADC ia kaba la tip kum ka Jaintia Hills Autonomous District Council Staff Association (JHADCSA) ia kaba la jah rngai namar ka jingmushlia palat ki MDC la pynkhie im biang mynta ka sngi ha kaba la jied ia ki nongkitkam ba thymmai jong ka.
Ki nongkitkam ba la jied mynta ka sngi ki kynthup ia u ma Johnson Pohrmen kum u President, u ma Normal Roy Blah kum u Vice President u Norman Roy Blah, u Johnwin Lyngdoh kum u General Secretary bad ia u Sanju Tariang kum u Assistant Secretary nalor kiwei kiwei ki dkhot.