Khlad noh U Irfan Khan, u khlur ka bollywood ha ka rta kaba 53 snem

U Narendra Modi, myntri rangbahduh ka Ri, ula thoh ha ka tweet jongu, ha kaba u phah ia ka jingsngew lem jongu, halor ka jingkhlad noh jong U Irfan Khan, uwei na ki khlur ba pawnam jong ka bollywood.

Nalor U Modi, U Amitabh Bachchan, u phah ia ka khubor sngewlem jongu sha U Khan, uba la khlad mynta ka sngi, ha ka rta kaba 53 snem.

U Khan, ula ioh pang, naduh u snem 2018, ha kaba la iathuh ba u ioh ia ka neuroendocrine tumour. La tep noh mynta ka sngi ia U Khan, ha Versova ha ka jingdon kiba ha iing ha sem ba iajan eh jongu.

Ha ka jing pynmih khubor na ka iing jong U Khan, ki la soti ia ki kyntien, kiba utei u aktor, ula ju kren bad kita ki long “Nga shaniah, hynrei nga la pyndem noh ialade (I trust, I have surrendered”). Kitei ki kyntien, la iathuh ba U Khan, ula thoh bad ula kren, hadien ba u ioh ia katei ka jingpang, ha u snem 2018.

U Irrfan, ula sdang ha ka kam ak phlim bollywood, ha ka phlim Bombay ha u snem 1988 bad ula ak ha shibun ki phlim, ba kynthup ia ki phlim hollywood kum ka Jurassic World bad ka Slumdog Millionaire.