Ujor pulit ka KSU Narpuh, ba kylla rong ka Wah Lukha

Shillong: Ka Khasi Students’ Union (KSU ) Narpuh Circle mynta ka sngi, ka la ia kynduh ia u Bah R. Rymbai O/C ka Lumshnong Police Station ha kaba la buh ia ka jingujor, pyrshah ia ka jingpynjaboh bad ka jingkylla rong ka wah Lukha, kaba la jia naduh ka 23 tarik mynta u bnai bad ka jingiap pathar ki dohkha da ki hajar tylli bad rit bad khraw, haduh ba la buh ia katei ka jingujor la iohi ba ki jaboh ki dangtuid sah ha katei ka wah khlem sangeh.

Ha katei ka jingiakynduh la ialam da u Bah KS Suchiang President ha ka jingiadonlang u bah Phanuel Tongper Vice President, bah Sanatomba Bamon General Secretary ha ryngkat ka jingsynran lang ki dkhot.

Lah ban pynkynmaw ba ka jingkylla rongblue ka wah lukha bad ka jingiap ki dohkha ha katei ka wah ka la jia nyngkong ha u snem 2007 bnai Rymphang bad naduh katei ka por ka jingkylla rong katei ka wah bad ka jingiap dohkha ka dangiai bteng haduh mynta. Dei halor kane ka nongrim ka seng ka leit ban buh da ka jingujor ba ki bor ka aiñ kin shimkhia ban bud dien ban lap ia ka jingshisha. Ia katei ka jingujor la leit ai kopi ruh sha u Deputy Commissioner EJH bad sha u Superintendent of Police EJH.