Duwai kyrpang na bynta ki Nongsynshar, ki Nongsumar, ki Nongialam, bad kine ki mat harum

Scholar Lawriniang (Nongthliew WKH)

U Paul haba u sneng kyntu ia ki briew ha ka shnong Kolosai u ong, To iaineh skhem ha ka jingduwai da kaba ap sharai ha kata ka jingainguh, bad u ong ruh: To duwai lem na ka bynta jong ngi ba U Blei un plie ha ngi ia kata ka jingkhang. (Kol 4:2) nangta ia ki briew ha Thessoloni pat u ong ba ki dei ban pynshlur ia kiba tlot mynsiem, bad to sneng ban kyntu kynpham lem ia kiba tlot (Thes 5:14) kumta ngi sngewthuh ba ka jingduwai bad ka jingia kyntu kynpham lem na bynta ki para mynsiem ka long kaba donkam haduh katta katta, la ka long ha ka jingduwai ne ha ka ktien pyntngen ba ngi ia pyni lem ia kiei kiei baroh kiba bha.

Ka jingduwai kam dei tang u khristan u ba pyndonkam ia ka, hynrei baroh kiba ngeit bad shaniah ha U Blei ba im hi ki pyndonkam ia ka jingduwai kum ka jingiasyllok hapdeng jong ki bad U Blei.
Kumta nga kyrpad bad pynkynmaw lem ha phi baroh ba phin kynmaw kyrpang lem ha ki jingduwai jong phi ha la U Blei ba phi nheit ia kine ki mat harum:-

Ki mat jingduwai:-

1. Duwai kyrpang na ka bynta ki Nongsynshar ka ri bad ka jaitbynriew ba kin lait na kane ka jingpang khlam kaba shyrkhei, bad ba kin nanglah ban synshar kham bha ha kum kane ka por kumjuh ruh ba kin nang kynmaw ia U Blei.
2. Duwai kyrpang na ka bynta ki Nongsumar ha kum kane ka por bun ki Doktor, Nos(Doctor,Nurse) bad kiwei kiwei ki nongtrei ba shakri ha ka koit ka khiah ki la aiti met bad Mynsiem na bynta u paidbah , don kiba duh noh ia la ka jingim ruh na ka bynta u paidbah ba ki ngat ha kane ka khlam. Kumta duwai kyrpang na ka bynta kine ruh ba kin lait na kane ka khlam shyrkhei.
3. Duwai kyrpang na ka bynta ki Nongialam bapher bapher naduh ki nongialam shnong, Ki kynhun Sengbhalang, ki riewshimet ba shlur, kiba la aiti met ban mynsiem ban trei shitom na bynta u paidbah ha kane ka lockdown mynta.
4. Duwai kyrpang na bynta ki Nongtrei sorkar (Officer) kiba long hi ki nongbah tympa u paidbah kiba la ia trei shitrhem bha met ban mynsiem na ka bynta u paidbah ha kane ka Lockdown.
5. Duwai kyrpang na bynta ki bor pahara (Police & Army) ba ki la ai ka jingshakri miet la bad sngi na ka bynta ka iap ka im u paidbah ki la shah ia u slap ka sngi ka lyer, ban teh lakam ia ka khlam ban saphriang ha ka jaitbynriew.
6. Duwai kyrpang na ka bynta ki Nongialam niam bapher ba pher ba kin nanglah ban iaineh ha ka jingshakri jong ki, bad ba kin nanglah ban ialam ia la ki bangeit ha kum kane ka por.
7. Duwai kyrpang na ka bynta ki nongpang ki ba la shah ktah ha kane ka khlam ba U Blei un pynkhiah noh ia ki.
8. Duwai kyrpang na bynta ki para mynsiem kiba ba kordor ba kin nang phai khmat sha U Blei ha ki por baroh.
9. Duwai kyrpang na ka bynta ka ri bad ka jaitbynriew ba ngin nang iatylli kawei.
10. Duwai kyrpang ba U Blei un weng bad pyniap tyrkhong , pynjah duh pynjam dam noh shisyndon ia kane khlam shyrkhei (Covid 19) ha ka pyrthei baroh kawei.

To ngin long ia kita kiba ia prat lem ha ka juh ka jingmut jingpyrkhat, da ka jingiashim bynta lem jong ngi baroh ha ki jingduwai kan pynlong ba U Blei un sngew ia ki jingud jingkyrpad jong ngi, bad un isynei lem ia ngi ha kum kane ka por ba shyrkhei. “Lada ki briew jong nga ki ba la khot da ka kyrteng jong nga, kin pynrit ialade bad kin duwai, kin wad ia ka khmat jong nga, kin phai na ki lynti, bymman jong ki: kumta te ngan sngew na bneng, ngan map ia ki pop jong ki, ngan pynkhiah ia ka Ri jong ki” 2 (Khronikl 7:14) Lada ki briew kin duwai – U Trai un shim noh ia ki jingpang jingkhraw baroh, un ym buh ia kita ki jingpang ha ngi ia kawei ruh na kita ki jingpang kiba sniew jong ka Ri Egypt ne jong kano kano ka Ri, hynrei un buh halor kita kiba shun ia ngi. (Deuteronomi 7:15)