Ki pulit jongngi, ki la nang mynta te!

Bah RM Shabong

Ha kane ka jingwan jong ka khlam coronavirus, la iohi, ba ki pulit ka Jylla, ki la leh ia kawei ka bynta kaba kongsan bha bad kata ka long, kaba kim pat ju leh mynno mynno roh bad kata ka long ba mynshwa ki ju bat da ka suloi bad u lathi, hynrei mynta ki bat da ki jingai sngewbha sha ki paidbah, kiba duk ba jynjar.

Kane ka long ka bynta kaba kongsan shibun eh, na ka bynta ban wan rah ia ka jing iadei hapdeng u paidbah bad ki pulit bad kaba la ju leh da ki shipai BSF, ha ki shnong khappud, la da ki bun phew snem. Ka sorkar Jylla, ha ka jaka ba kan ailad tang ia ki BSF, ba kin khlong ia ka pisa jong ka sorkar India, lyngba ka skhim border area, ka la dei ba kan ai bhah lang, ia ki pulit jongngi, ba kin iohlad ban ia bujli riam tyngkhat, lane ba kin ia pynlut por bad ki riew paidbah, ha kaba sam jing iarap sha ki duk ki raitoi bad katei ka dei ban long, ha kaba kum kane ka por jong ka khlam bad nangne shakhmat ha kiwei pat ki snem, ki ban sa wan. Haduh mynta, ngi iohi, ba ki don bun bah ki jingiarap, kiba ki MLA/MDC kim juh lah ban ai, hynrei na kti ki BSF, ki pahuh pahai, naduh ki kot pule, ki mashin bapher, ki miej ki shuki, ki lynti syngkien bad ki kam jongki, ki la long hi malu mala, la kat ka kyrdan jong ki MDC.

Kam dei tang katta, ha ka jingshisha, ka la dei ka kamram jong ki MLA, kiba wan na sha ki thain khappud bad ka Bangladesh, ba ha kaba kum kane ka por, kin thoh bran bran sha ka sorkar India, ba kan ai jingiarap kyrkieh ia ki nongshong khappud, lyngba ki jingiarap, ba kin lah ban trei ban ktah ha kine ki sngi jong ka pakhang shnong jong ka sorkar, hynrei lada ka sorkar jylla lane ki nongmihkhmat kim kynmaw satia ia kata, kumta ngin sa iohi, ha ki khyndiat bnai ban sa wan, ba un sa pyndep hi u BSF, na la ka jong ka bhah, kaba un ioh na ka tnat kam poh iing jong ka sorkar India.

Ka shu don ka jing pyrkhat, ba katei ka skhim, ka poi ei noh sha ki BSF, namar ba ha ki MLA, kim kwah ban ai bhah iano iano ruh, namar ba ki pynlong ia ka kum ka MLA skhim, ha kaba kin sam sha ki briew kiba ki sngew iahap bad kiba ki sngewjan bad ba ka dei ruh ka skhim, kaba ka pisa ka jan bha, namar ba mar ia trei, ka boina, la dep ioh lypa bad mar ia dep trei, la ioh pura ka jinglut baroh khoit.