Ther U Mukul, ia U Conrad Sangma, ba pynkiew dor petrol, diesel

Shillong: U Dr Mukul Sangma nongialam ka liang pyrshah mynta ka sngi u la thoh da ka shithi ia u myntri Rangbah ka jylla u Conrad K Sangma ban dawa na ka sorkar ban weng noh ia ka rai halor ka jingpynkiew dor ia ka Petrol bad Diesel ha ka jylla.

U Dr Mukul u la ong ba ka long kaei kaei kaba ym lah ban sngewthuh ba ha kum kane ka por ba baroh kawei ka Ri ka don hapdeng ka jingeh kaba khraw, hynrei na ka liang ka sorkar Meghalaya ka la shim ia ka rai ban pynkiew ia ka khajana ia ka Petrol bad ia ka Diesel lyngba ka Value Added Tax ban pyndap ia ka pla tyngka jong ka sorkar.

U la ong ruh ba kaba sngew kyndit ka long haba ka dor jong ka umphniang ka la hiar dor ha ka pyrthei, hynrei la shu pynkiew, kane ka jingpynkiew ia ka Petrol bad Diesel ka ktah ia ki paidbah. Dei ban tip ba ka jing sa phriang ka khlam COVID-19 ka dei ka jingjulor kaba la dep ban pynbna da ka sorkar pdeng hapoh jong ka Disaster Management Act, 2005 jong ka kyndon (j) bad (k) jong ka kyndon (2) jong ka kyndon kaba 38 ka DMA 2005.

U la ong ruh ba kane ka jingpynkiew dor ia ka Petrol bad Diesel kan ktah ia ki paidbah ha kane ka por ba ka Ri bad ka jylla ka don ha ka jingeh.

Ha ka shithi kaba u la thoh sha ka sorkar u la ong ba ka jing pyn kiewdor ia ka dor ka petrol bad Diesel ha kane ka por ba dang don ia kane ka jingialeh pyrshah ia u COVID-19 kan ktah jur ia u paibah.

U Dr Mukul u la kdew ruh ba kane ka khlam COVID-19, ka la ktah ia ka ioh ka kot jong ka pyrthei baroh kawei bad ki ri jong ka pyrthei ki la shim ia ki lat ki lynti baroh ban ialeh pyrshah ia kane katba ki lah.Ha Ri India ruh kaba la shah ktah bha bad na ka liang ka sorkar ka la shim ia ki lad ki lynti ban iada ia u paidbah jong ka Ri.

U la ong ruh ba kumba long mynta hi ia ka jingduh un ym lah ban khien, ha ka jing lynga pisa ha ka jingduh ia ka kamai kajih, ka sorkar ka dei ban peit ia kane bad ban pyntrei kam ia ki lat ki lynti kumno ban kyntiew ia ka koit ka khiah bad ia ka trei ka ktah ban pynlait ia ki briew na ka jingjynjar.

U la ong ruh ba ha kane ka jingialeh pyrshah, ka donkam ia ka jing iatreilang jong baroh ban poi sha ka thong.