“To sait phi, pynkhuid ialade” Isaiah 1:16 (“ Wash yourselves, make yourselves clean”)

Rev . B.P.Pohsngap

U Isaiah Nongiathuhlypa ba khrawbor jong U Blei haba Un shimti ia ka kam nongiathuhlypa, U la iohi nyngkong ialade, kumno u long bad u pynrit ialade da kaba kumno ngan long uba bit ia ka kam U Kynrad (U Blei) na kaba la pynrit ialade, U Trai U ba U Blei Uba la ibit ia u ban long u nongiathuhlypa, U la phah ia ki serap ki Angel, ban pynlong ia u uba khuid.

U Isaiah u la iohi paw ia U Trai, ba U shong halor ka khet, bad sawdong jong ki serap ki kaweh ki thapniang bad ka jingpyrta, U Bakhuid, U Bakhuid, U Bakhuid, U Trai ki pait, ka khyndew baroh ka dap da ka burom jong U. Ki nongrim ka khyrdop ki la win ruh da ka jingsawa uta uba pyrta, bad ia ka ing la pyndap da ka tdem. “Te nga la ong, kordit ia nga namar nga la iap; namar nga long uba tngit ki rymmiang shyntur bad nga shong hapdeng u paitlang ba tngit ki rmiang shyntur, naba ki khmat jong nga ki la iohi ia U Syiem, U Trai ki pait”. Isa 6:1-5. “ Uwei na ki serap u shim da ka nap na ka duwan bad u la wan sha U Isaiah bad u la ktah ia ka rymmiang shyntur jong u bad ong de, “Ha khmih ia ka jingbymhok jong me la weng noh, bad ia ka pop jong me la pynkhuid noh..” Dk.7. ban ia don bynta bad U Blei ha ka jingim baroh shi lynter ka jingim, donkam eh ka jingim kaba khuid. Kane ka khubor ka khot ban ia beh ban long khuid. Kum ki nongialam ha ka Ri bad ka Jaitbynriew, ha ka shnong ka thaw, ha ka imlang sahlang, khamtam ha ki rangbah niam, rangbah Balang, ne Pastor, Nongialap ne ki phadar, ka jingkhot kaba ha khlieh tam ba ngin long kiba khuid, da ka ba pdiang bad ngeit ia Uta Uba lah ban pynkhuid ia ngi da ka snam kaba U la pynmih ha ka diengphna ha ka Kalbari, bad dei kane kein ka lynti ia ngi ki briew, kiba la ban bein ka pop, ba ngi lah ban long khuid. “ Te kane ka long ka khubor ia kaba ngi la iohsngew na U, bad ngi ia pynbna ha phi….” “ bad ka snam U Jisu U khun jong U Blei, ka pynkhuid ia ngi na ka pop baroh.”. “ Lada ngi phla ia ki pop jong ngi, U long Uba iaineh bad Uba hok, ban map noh ia kita ki pop jong ngi bad ban pynkhuid ia ngi na ka jingbymhok baroh”. 1 Ioan 1:5-9 .

Ki bynriew baroh, ki Balang Khristan baroh, khlem ka jingim kaba khuid, ki long bymman baroh ha khmat U Blei. Sa katto katne ki mat ngin peit mynta.

1. Ka jingkwah ka jong U Blei ia ki bynriew baroh. Ka kitab Lebitikus 11:30 U Blei U ong kumne, “ Naba nga long U Trai U ba la ialam noh ia phi na ka Ri Ijipt ia kaban long U Blei ia phi; KUMTA TO LONG KIBA KHUID, NABA NGA LONG U BAKHUID”. U Blei U la pynpaw ia ka jingieit kaba khraw jong U, ba U la pyllait ia ki Israel na Ijipt bad U kwah eh ia ki ba kin im ha ka lynti ka jingkhuid. Mynta ruh ia nga ia phi, kiba U la siewspah da ka snam jong U Khun jong U, da kaba U la shah halor diengphna, U kwah ia ngi ban iaid ha ka lynti ka jingkhuid met bad mynsiem. Kam long kaba itynnad , ne kaba idei iaroh, lada ngin ong lehkhuid im khuid, tang ha ka mynsiem, hynrei ia ka met pat, yn im kynja doh. U Apostol U ong, “Namar la thied noh ia phi da ka dor bah, te namar kata to pyndonburom ia U Blei ha ka met bad ha ka mynsiem jong phi kiba long ki jong U Blei”. 1 Kor 6:20
2. Ki jinghikai U Jisu : U Jisu mar ia sdang ka Ministry jong U ha ka pyrthei jong ka jingim, U sdang nyngkong eh ban ialap ban kdew ia ki briew sha ka jingkylla kabamut, Mat 4:17. “Naduh kata U Jisu U la sdang ban ialap bad ban ong, “TO KYLLA KABAMUT; naba ka hima ki bneng ka la jan”. ka jingkylla kabamut ka dei ka lynti bah sha ka jingkhuid jong ka jingim. Ioh don kiba kwah ban kylli kumno ban kylla kabamut, haba la kha ia ngi ha ki ing Khristan?. Peit ngan ai da ka jingiathuhkhana ba jia shisha, la don uwei u briew uba pyrkhat tang kumno ban ioh spah ne ban kot ban biang. U la sdang da kaba khaii, bun jait ki kam , ngan iathuh tang artylli, u la leit thied jhur ha Iewduh bad u la thied ar polo heh u jhur, ynda u la phah kit ha ki nongkit, u ong ia iba die , ap beit hangto, nga tang shu dep buh ha ka kali ngan wan ai pisa, hynrei jlang u phet beit khlem siew shuh u bai jhur. U la kmen ba u la ioh ei. Ha kawei pat ka por, u la leit tuh ia U Masi heh na sem mynmiet bad u la beh beit beit sha jaka ot doh Masi. Kane ruh u la kmen ba u la ioh spah. Katba trei ruh um man bha kumba dei, namar u iaid da kata ka lynti, ka thok ka shukor. Ha kawei ka sngi, ka don ka jingpynkhih ban ia kynduh ia u briew jong U Blei. U la hikai U la duwai bad u la pynkynmaw haba kylla kabamut dei ban siew ia kaba la shim ne la tuh. U la phla ba U leh kumta ki kam thok, bad u briew jong U Blei, u ong khie leit pan map bad siew ia kita baroh. Kloi u la leit sha ita iba dei jhur, namar ba lah slem im ithuh shuh ia u. u kylli phi ithuh ia nga? I ong em, I la phla I ong manga uto uba thied jhur na phi ar polo , sngewbha map ia nga kong, bad ong katno ngan siew. I ong, ani bah la katta snem kaei kaba pynlong ia phi kumta?, I ong nga la pdiang bad ngeit ia U Jisu Uba hikai ia ngi ban kylla kabamut bad phla ia ki pop ba la leh baroh. Ita I kong I la map ei ia I bad I la dap da ka jingkmen bad ainguh ia U Blei Uba la map ia ki pop jong i bad ki briew ruh ki map ia I, ia kiwei ruh u leh kumta baroh, kane ka dei ka lynti kaba U Jisu U kwah ban poi sha ka jingim kaba khuid na ki pop baroh. U Jisu ym dei tang ba U ialap, hynrei U hikai ruh. Mynba U sdang ia ka jingiathuh khana halor u lum, U la hikai kawei kaba dei ia ka bynta jong ka jingkhuid, U la ong Mat. 5:8, “Suk kiba khuid ha ka dohnud; naba kin iohi ia U Blei”.
3. Ka kam jong ngi iwei pa iwei : Baroh u bynriew ha ka pyrthei, u tip shai ba kane ka pyrthei ka dei ka Ri nongwei, pyrthei shongbasa, ngim don jingkyrmen ei ei, ba ngin shong sah hangne, bad haba kumta, kaei kaba ngi dei ban leh. Namar ngim tip lano ngin leit, ngin trei kum kiban shongsah hangne, bad ngin im ha ka jingkyrmen, ia kata ka Ri kaba dap tang ka jingkmen suda. U Apostol Ioannis, u ong, “ Te uwei pa uwei baroh uba don kane ka jingkyrmen ha u, u pynkhuid ialade, kat kumba ma u, u long uba khuid”. “ To sait phi, pynkhuid ialade”.

Nga duwai ia kiba ngeit baroh, ban iaid da kane ka lynti, kam pher phi don ha kano ka Balang, tang ka JINGKHUID hi kaba long ka lynti Lyngba U Jisu Khrist. Ka jingiathuhlypa shem mynsiem, ki Nongthaw jingrwai, “ Ka, Bible hi ka ong, “ To long kiba khuid, jingkhuid ka long ka jinghikai jong ka, ka tynrai jong ka, ka long ban ngin ioh khuid, bad ba ngin Kohnguh ia U Trai Uba U Blei. Bneng ka long ka jaka khuid dap da burom bad jingkhuid, pop kan nym ioh rung hangta, lada khyrdop ki rynghang, jingsniew phar ki khang, pop kan nym ioh rung hangta.

            U Blei ka jingkhuid Un kyrkhu AMEN………..