Mang T.4 klur, ym iohi dak ka jingkieng Wahjapuh

Shillong,7 Nailur:
Ka FKJGP Southern Ri-War Zone, dang shen ka la leit ban jurip ia ka jingkieng Wahjapuh, kaba don hapdeng ka lynti ban leit na Ichamati ha Majai, bad ha katei ka jingleit jurip kaba ia lam da u General Secretary u samla Ksanboklang Kharshing ka la lap ba katei ka jingkieng kaba la dep mang tyngka ban shna thymmai noh ka dang sah khohreng haduh mynta .
Katkum ka kyrwoh ba la pyllait paidbah da u GS ka FKJGP SRZ ka la ioh jingtip ba ia ka jing kieng Wahjapuh kaba pyniasoh ia ka Ichamati bad Majai la dep ban pynmih ia ka Work Order naduh u jylliew 2012, bad ha katei ka WO la buh por ban pyndep ia katei ka jingkieng hapoh 24 bnai kaba mut ar snem, bad la mang tyngka ban pynlut na ka bynta ban tei thymmai ia katei ka jingkieng haduh T. 3,95,84,120 tyngka kaba mut la jan kot T.4 klur tyngka.
Ha katei ka jingleit jurip ka FKJGP ka la lap ba wat hadien ba katei ka 24 bnai ka la palat, hynrei ka dang lap ba ka jingtrei ka dang sah khongreng bad la sdang trei ia katei ka jingkieng dang kumba 5%. Halor ka jingleh sting ban pyndep ia katei ka jingkieng , na ka liang ka FKJGP SRZ ka la ong ba shen kan sa leit ban ia kynduh ia U EE PWD (Roads) Sohra Division bad ia U Chief Engineer PWD (Roads) Shillong ban buh ka jingdawa ban pyn dep noh mardor ia kane ka Jingkieng.
Lah ban pynkynmaw ba na ka liang ki nongthohkhubor ruh ha ki khyndiat sngi ba la dep ki la ioh ban jurip ia kate ka jingkieng Wahjapuh, bad kaba kham i shyrkhei ia katei ka jingkieng ka long na ka daw ka jingpynkhein ain ki trok kit mawshun, kaba lah ban mih kano kano ka jingma ia ki paidbah kiba iaid lyngba katei ka jingkieng.
Ki trok kit mawshun ki la pynkhein ia ki kyndon ba la pynmih da u ADM i/c Sohra Civil Sub-Division,uba la pynjari Section 144 CrPC ia katei ka jingkieng, ha kaba ym shah ia ki trok heh ban iaid lyngba na katei ka jingkieng bad la thoh shai ruh ha ka sign board ba yn shah tang ia ki trok rit 207,407 bad ki traktor ban iaid. La thoh ruh ba ym shah ban kit palat ia ka 6.00 MT. Hynrei kaei kaba ki nongthohkhubor ki la lap, la iohi ba ki trok heh kiba iaid lyngba ia katei ka jingkieng, ryngkat ka jingkit mawshun mam-mam.