Shillong: Mynta ka sngi ka All Meghalaya School Parents Association (AMSPA) ka la thoh sha u myntri ka tnat pule puthi ka jylla u Ma Lakmen Rymbui ban kyntu ia ka sorkar Meghalaya ban tuklar halor ka jing shim bai skul ki skul private ka kane ka por ba don ka jing pakhang shnong lane ka ‘lock down’ ha baroh ka ri India.
Ka AMSPA ka la pynpaw ba ka la ioh jing tip ba don ki skul ki la sdang ban phah siew bai skul na ka bynta u snem 2020-2021 bad kane kan buh jingeh ia bun ki kmie ki kpa jong ki khynnah skul khamtam kum ha kane ka por ba baroh ki jing trei kila khang lut namar ka ‘lock down’. Ka AMSPA ka la pynpaw ruh ba don ki skul kiba la pynkiew ruh ia ka bai skul bad kane ka pyni ba ki iaid lait ia ka jing bthah ka ing bishar ba khlieh duh ka ri India bad kum juh ruh ia ka jing btah ka that pule puthi ka jylla Meghalaya.
Nalor ka bai skul ki khynnah, ka AMSPA ka la pynpaw ruh ba don ki skul kiba khlem siew ia ka tulop bad don ruh kiba siew tang shiteng tulop ia kiba trei hapoh skul naduh ki nonghikai haduh kiba trei ophis.
Halor kine ki mat ka AMSPA kala kyntu ia u myntri ka tnat pule puthi ka jylla u Ma Lakmen Rymbui ban tuklar bad ban pynshitom ia ki skul ba pynkhein ia ki kyndon ba la bthah da ka sorkar kum ha kane ka por ba don ka ‘lockdown’ namar ka jing pang ‘corona virus’.
Phi don ban ong eiei?