Shillong: Ka Jaintia Students’ Union, ka la buh ka jingujor ia ka jingkiewdor ki marbam bad tiar donkam lyngba ka shithi sha u Deputy Commissioner ka West Jaintia Hills, ha kaba la phah da u Central Body President u samla Lawyerson War bad u War Jaintia Circle President u Eddy Kery Pohtam ha ka 22tarik Iaiong 2020.
Ka JSU ka la kdew ba ka la ioh jingujor ba ki dukan die khutia kim lah ban pynduna ia ka dor namar ba ma ki ruh ki hap ban thied ha ka dor ba rem.
Ka JSU ka thoh ruh ba don ki dukan naduh kiba die khutia bad wholesale kiba shim kabu da kaba die rem. Kumta ka la kyntu ia ka bor sorkar ban pynshitom ia kiba shim kabu.
Ka JSU ka la ju ai jingmut ruh ia ka sorkar lyngba ka shithi sha u myntri rangbah, ha ka 6tarik Iaiong 2020, ba ka sorkar kan bthah ia ki dukan ban pyni ia ki dor tiar dukan bad ruh ka jingdon ka stock ka jong ki ha khmat dukan. Ka seng ka ai khublei ruh ia kane ka jingbthah da ka sorkar ban pyni ia ki dor tiar kaba mih dang shen.
Ka seng ka la kyntu ruh ba dei ban pyni ia ki stock ba man ka sngi ba don ha ki dukan khamtam ki jingbam kum u khaw, dai, shini, shana bad kiwei. Kumjuh ruh ka la kyntu ia ka sorkar ba kan bthah ia ki dukan ba ki dei ban buh ruh ia ki phone no. jong ki ophisar, lane ki briew ba dei peit khnang ban lah ban buh ka jingujor da u riewpaidbah lada don ki dukan kiba kwah shim kabu.
Phi don ban ong eiei?