Lap shynrong khlieh na jingkieng Mawkdok

Shillong,7 Nailur:
Ki nongshong shnong jong ka shnong Mawkdok, mynhynnin ka step ki la lap ia kawei ka shynrong khlieh briew na jingkieng Mawkdok, kiba lap ia katei ka shynrong khlieh ki dei ki briew jong katei ka shnong kiba la leit ban wad ngap, bad ki la lap na kawei ka khlaw kaba don hajan ka jaka peitkai ha Mawkdok, na ka jaka ba la tip kum ka ‘ Shlem U Nok’ .
Ia katei ka jingjia , u SDPO ka Sohra u bah Ian Onel Swer u la pyntip ba ki pulit ki la ioh jingtip ha ka por 7 baje jong ka step sngi saitjain, lyngba ka jingpyntip kaba ki la ioh na u bah M.Number Lyngdoh uba shong ba sah ha Mawjrong.
U SDPO u ;la ong ba tang mar ia ioh jingtip ki pulit ki la hiar sha katei ka jaka, bad ki iit bniah ia katei ka shynrong khlieh briew, bad kham hadien ki la shimti noh ia ka ban phah sha Forensic Lab, hadien katei ki pulit ki la wad sa ia ka met jong katei ka khlieh kaba ki la lap, iathuh ka khubor na u SDPO, Sohra.