Wat pyndonkam ia ki rapid test, na ka bynta ar sngi, ong ka sorkar India

Ki la don bun ki jylla, kiba ujor ba ki rapid test kim trei kam bha satia ban wad ia ka jingpang coronavirus ha u briew bad hadien katei ka jing ujor, ka sorkar India, ka la bthah ban sangeh shwa, kaba pyndonkam ia kitei ki test ha kine ki ar sngi ki ban sa wan bad la iathuh ba ka Indian Council of Medical Research (ICMR), kan sa phah ia ki briew jongka, ba kin jurip bha ia kitei ki tiar ban lap la ki long kiba trei kam ne em. La iathuh ba kitei ki tiar, ki dei kiba dang shu wan poi ha ki khyndiat sngi ba ladep na China.

Ka sorkar Rajasthan, mynta ka sngi, ka la sangeh ban pyndonkam ia kitei ki tiar, namar ba kim iahap satia. U Raghu Sharma, uba dei u myntri ka koit ka khiah ka sorkar Rajasthan, u iathuh ba kitei ki test, ki trei kam tang kumba 5.4 percent, na kaba ju long 90 percent bad kumta la shim ba kitei ki tiar, ki long ki bym lerkam satia.