BALEI IA NGA

S.K.N

[ba bteng] Mynta haba ka pyrkhat ia kata ka ktien ka Niakha, ka la rai kut ba lada tang shu ioh lad ban mih na iing kan leit beit bad la ka Niakha.
Da ki taiew ka Rida kam shym la ioh lad satia watla ka pyrshang da bun ki rukom ban pan leit iew na la ka kmie. Ka jingshah set khop hapoh iing ka la nang pynbitar ia ka mynsiem ka Rida.

I Niakha ka Rida i la lyngngoh ba ka Rida kam ju wan mih satia sha dukan watla, toi ha ka jingshisha ka Iewduh ka dei ka Iew kaba ym don ba lah ban kiar namar baroh ki jingsiew ha iing kiba bun hi ki shaniah nangne. Ha kawei ka sngi katba dang iakhana bad i Kong Mer i Niakha ka Rida i la kum kylli biang.

“I to i khun kha jong nga im ju wan mih shuh shane…?” La kylli i Niakha ka Rida
“Tip nga kynmaw tang kato hi shisien ba i wan wad iaphi… Hadien kata ngam ju kynmaw shuh ban iohi ia i ia i to i Kmie jong ka ruh ngam ju iohi syrngiew shuh…” La phai ktien i Kong Mer
“Hooid kein phi… Tip ki ia long ia man kumno… ” la kren lyngngoh sa i Niakha ka Rida
“Ioh ki sngewsih na ka Dukan pynban ba phi shong hi noh…” La buh jingkylli i Kong Mer
“Ni tip shuh kein Mei Ieid, haba khlem da dei hok pat yn leh kumno kein… Ki la dei kein ban sngewthuh khamtam i Kmie jong ka…” La bynrap nia i Niakha ka Rida
“Lada phi lap por phi la dei ban leit wad ia la i khun Kha namar i dei u symbai u Hynmen …” La ai jingmut i Kong Mer
“Ka dei Mei ieid.. Sa tang sngi Robibar hi ba lait hynrei ban sngi pohia te la shitom haba kumne phin lap shano…” La ia mynjur i Niakha ka Rida
Ka jjngai jingmut i Kong Mer ka la nang iai kyrsiew ia ka dohnud i Niakha ka Rida. Ynda la poi ha iing ka pur iathuhkhana shaphang ka Rida ha la u lok bad la ki khun. Hangta ruh ki la ia pynpaw ka jingsngewlem ia la ka Bakha. Kumta da kawei ka jingmut ki la iakut ban leit mih sha iing ka Rida i Nia jong ki ha ka sngi Robibar kaba bud..

“Ngi la dei hooid ban leit wad ia i Nia bad i Bakha bapli..” La ia mynjur lem kiwei pat hapoh ka iing.
I Niakha ka Rida i la sngew kmen ba baroh ki la ia mynjur lang ban leh kumta.
Kumta ha ka sngi babud marsien poi ha Iew, i Niakha ka Rida i la iathuhkhana ia kata ha i Kong Mer
“Mei ieid, mynnin mynmiet ngi la ia kut ban leit mih noh sha iing i Khun Kha kumba ai jingmut lem ma phi.. Nga da sngew dei palat ia kato ka jingmut ba phi ai namar da lei lei kum ki nong Kha ngim dei hi ban klet ia i mat pyni u Hynmen..” La iathuh bniah i Niakha ka Rida
“Kumta kein ka dei palat.. Phi Kong Thei kum ban shu ong noh namar ka ju don hi ka jinglong briew, ka jinglehrain khamtam haba duk ban leit ban mih sha iing kito kiba kham riewspah kham ioh kham kot. Lehse i Nia bad i Khun Kha jong phi ruh ki don kaba kum kata ka jingeh ha ka jingim jong ki ha kaba iadei bad phi…” La nang bynrap nia shuh shuh i Kong Mer
“Ka dei kata Mei ieid, la Robibar ynda ngin leit ngin hab ban kren ia kata ruh imat ba kin ym don bapli kynrad kum kata ka jingsngew”. La phai ktien sa i Niakha ka Rida
“Ka bha ban sngewthuh kumta… Namar kum ngi ba mih na iing baduk kata ka jingsngew ka dei kawei na ki jingeh..” La pynkut ktien i Kong Mer
Kumta ruh ha ka kata ka sngi ki shu ia pynkut ktien hangta shaphang kata ka bynta.
I Kong Mer i la sngew tynnat eh haba iohsngew ia kata ka khubor ba i Niakha ka Rida i iathuh.
Haba la poi ka Robibar na ka iing i Niakha ka Rida khlem da iathuh ki la hiar ban leit sha iing ka Rida ka khun kha ha Jaiaw Shyiap. Kumba iuh tdong bsein marsien iohsngew ia ka sur ka Niakha katba ka dang khot
“Rida o Rida….”
Ka Rida ka la mih wut na iing ban leit khmih. Hangta hi ka iohi khrui saw ngut ki iawan ki jong i Niakha jong ka ryngkat u lok jong ka bad ki khun jong ka ar ngut.
“Ale ale Niakha… ” ka ialam na khmat na khmat
“Kumno phi long…?” Ka la kylli