Shillong,5 Nailur:
U Superitendent of Police ka East Khasi Hills u bah M.Khar krang mynta ka sngi u la lum ia ka jingialang jong baroh ki kompeni Mobile kiba kynthup ia ka Airtel, Vodafone, Reliance,Idea bad Aircel ban ia kren kumno ban khanglad ia ka jingpyn iaid iew ia ki sim Card kiba la shu pyndonkam be-ain khlem da ithuh ia u trai bad kiba dei kiba shu thied black, khnang ba ki runar kin ym iohlad shuh ban leh ia ki kam pyntriem kum ka jingdawa pisa, ka kam rahbor bad kiwei pat da kaba pyndonkam da kitei ki sim card ki bym ithuh trai.
Ha katei ka jingialang kaba la long ha kamra treikam u SP, kitei ki kompeni ryngkat bad ka tnad pulit ki la shim ia ka rai ba ki nongpyndonkam ia ka Sim Card ki dei ban aplai ryngkat ki dur kiba ia hap bad u nong aplai bad ha ka dur dei ban don ka jingsoi kyrteng ka ban hap ban soi shuwa ban phah sha ki kompeni. La rai ruh ba ki dei ban pynbiang ia baroh ki kot donkam kum ka EPIC kaba la attest, kaba pyni ia ka jaka shong jaka sah kaba biang.
Ha katei ka rai la shim ruh ia ka rai ba kino kino kiba ai sim card khlem ioh ia ki jingpynshisha ia ki kot ki sla kiba biang kin ngat ha ka jingpynshitom katkum ka ain ka bym don jamin, bad la bthah ruh ia baroh ki O/c bad I/C jong baroh ki Police station bad Police Out post ba kin lum jingialang ia baroh ki retailer ban pyntip bad pyntreikam ia katei ka kyndon.
Phi don ban ong eiei?