Kam u MR ba ki ba ngat COVID-19 kim da jur ka jing pang

Shillong: U myntri rangbah ka jylla Meghalaya u Conrad K. Sangma mynta ka sngi u la ong ba baroh 10 ngut ki ba ngat jing pang ‘corona virus’ kim da jur than ka jing pang. U myntri rangbah u la iathuh ba ki la don kumba 738 ngut ki briew ba la phah eksamin bad 667 ngut ki dei ‘negative’ bad sa 60 ngut ka kaiphod kan sa wan shen.

Haba dei bad ka jing eksamin, na ka liang u myntri rangbah u la ong ba ka sorkar ka buh ia ka thong ha khmat duh eh na ka bynta ban phah eksamin khamtam ia kiba ia jan bha bad u Dr. Sailo Ryntathiang, ha shwa ne hadien ka 24 tarik lber 2020. U Conrad K Sangma u la iathuh ruh ba ba ki paidbah kiba la ia kynduh ia u Dr. Sailo kila dep ban pynrung kyrteng sha ka sorkar, kum shi bynta ban buddien ia ki nangne sha khmat. U la iathuh ba ka tnat ka koit ka khiah ka jylla ka la bthah ia ki ban sah kyrpang shwa 14 sngi (quarantine) hala ki ing lane ki dei ban phone ha u nomber 108 na ka bynta ban pynkynriah ia ki sha kiwei pat ki jaka ba la pynkhreh ka sorkar.

Haba dei bad kawei ka nongpang, u myntri rangbah u la ong ba ka dei kaba ju trei bad u Dr. Sailo bad mynta ka la ngat ia ka jing pang’corona virus’ bad ki briew ka tnat ka koit ka khiah ka jylla lem bad U Rangbah Shnong, ki la leit ban pynsngewthuh ai mynsiem ia ki long ing ba kim dei ban duh jing kyrmen ba ka sorkar ka ialeh shitom ban ai jing iada ia ki.

U myntri rangbah ka jylla u Conrad K Sangma u la kyntu ruh ia ki paidbah kiba shem jing jynjar ban ioh jaka na ka bynta ban sah kyrpang (quarantine) ba ki dei ban wan sha khmat bad kidei ban phone ha u nomber 108 na ka bynta ban ai jaka ia ki. U la ong ruh ba lada don kiba don hapdeng ka jing shitom ba kham jur ka sorkar ka la pynbiang ki jaka sumar kata ha hapoh ka hospital Civil Hospital, Dr. H. Gordon Roberts Hospital Care bad ka Nazareth Hospital kiba la biang khamtam haba dei na ka bynta ban buh ia ki ba shitom jur ha ki ‘ventilators’.

Haba dei bad ka jing kit ia ki mar rep, u myntri rangbah ka jylla u Conrad K Sangma u la ong ba ka sorkar Meghalaya ka la shah ia ki paidbah ban kit ia u kwai, tympew, synsar bad kiwei dei ki mar rep na ka bynta ban ioh die sha ki paidbah.