Ong u saiantis na Wuhan, ba ka Covid 19, ka ia bit ha ki miaw, ki masi bad kiwei ki mrad

U saiantis, uba la bud dien bha ia kajing saphriang jong ka jingpang coronavirus ha Wuhan, u iathuh ba katei ka jingpang, ka lah ban pur sha ki mrad ruh bad kitei ki kythup ia ki miaw, ki masi bad kiwei ki jait mrad.

Katei ka dei ka kaiphod, kaba la ai sha ka Pasteur Institute, ha Paris, ha kaba la pynmih mynta ka sngi, da ka Daily Mail.

Kitei ki stad, kiba dei na ka University of Hunan, ki la pule bniah ia ki tor jong ki 251 tylli ki mrad bapher bad ban lap la ka jingpang covid 19, ka lah ne em ban ktah ia kitei ki mrad, kumba ka ktah ia ki briew bad ha ka jinglap jongki, ki iathuh ba katei ka khlam, ka lah da kaba suk ban rung sha ki mrad bad kitei ki kynthup ia ki miaw, ki masi, ki blang, ki sniang, ki langbrot, ki shynreh bad ki paro ruh.

La ong ruh ba katei ka jingpang, hadien ba ka la rung ha ka met u briew, ka leit iabit sa sha kitei ki mrad bad hadien kata, ka sa rung biang sha ki briew, lyngba jong kitei ki mrad.

La ialam ia katei ka jing wad bniah da U Xing-Yi Ge, uba dei u virologist uba la tih bniah ha ka Wuhan Institute of Virology’s Centre for Emerging Infectious Diseases. La iathuh ruh ba ha u snem 2003, ha ka por jong ka khlam SARS, ka jingpang, ka rung ha u briew bad hadien kata, ka sa ia bit sha ki maw bad ki raccoons.

Ki saiantis ha ka jingpule jongki, ki pule bniah ia ki cells jong kitei ki mrad, kiba la tip kum ki ACE2, kiba long hi kum ki cell jong ki briew bad kiba kane ka jingpang covid 19, ka ioh ban rung sha ka met jong u briew. La iathuh ba ki ksew, kim long satia kum ki miaw, namar ba kim don ki cell kiba ia hap ia ki miaw bad kumta ki kham shitom ban rung sha ki ki met ksew. Katei ka jingpule, kam pdiang ruh ba ki lymbit, ki lah pyn ia bit ia katei ka jingpang covid 19 ia ki briew, wat la ka lah ban long tang ha ki katto katne ki khep.

Katei ka jingwad bniah, ka ong ba ka jingpang covid 19, ka lah ban rung sha ki briew, lyngba ka pangolin kaba la ju die bha ha iew Wuhan, lane ba ka lah ban ia bit na ki lymbit kiba lait phet na ki jaka shna dawai jong ka Wuhan, kiba pule ia kitei ki mrad.