Da ka ejahar ujor ka sorkar halor ka jing saphriang ki kyrteng jong ki nong pang napoh Bethany Hospital

Shillong: Ka sorkar Meghalaya mynta ka sngi ka la ujor da ka ejahar ban lap ia kiba donkti ban pynsaphriang iaki kyrteng jong kiba thiah pang hapoh ka hospital Bethany Shillong.

“Ngi la dep ujor da ka ejahar pyrshah iaki ba donkti ban pynsaphriang ia ki kyrteng bad ka jing tohkit kan dang iaid sha khmat ban lap ia kiba donkti” la bynrap u Conrad K Sangma mynta ka sngi.

Na ka liang u myntri rangbah u la pynpaw ka jing sngewsih halor ka jing saphriang ki kyrteng jong ki ba thiah hapoh ka hospital Bethany lyngba ki social media kum ki whatsapp bad kiwei kiwei de.

Na ka liang u myntri rangbah ka jylla u Conrad K Sangma u la kyntu ia ki paidbah ka jylla ban long kiba ia tylli na ka bynta ban iakhun pyrshah ia ka jing pang ‘corona virus’ bad u la kyntu ruh ia ki paidbah ban ‘delete’ noh ia ki kyrteng jong kiba thiah hapoh ka Bethany Hospital.