Ym shah dih kyiad ha NEHU

Shillong, 1 Nailur:
U President ka KSU u bah Daniel Khyriem u la ong ba ka jingialang kaba long mynta ka sngi, ka la rai bym dei ban shah shuh ban iadih kyiad ha NEHU bad dei ban buh CCTV ha NEHU ban iada haba mih kano kano ka jingjia kumba la jia ha kane ka sngi u Blei.
“Ha ka jingialang, ki kynhun bapher bapher la rai ba ym shah shuh ban rah ne dih kyiad ha NEHU”, la ong u Bah Khyriem bad bynrap ba kiba leh pyrshah, kin shah pynsaja.
U la ong ba la ai jingmut ban thaw ia ka kynhun baroh ban don ka jingiajan ban nym mih kano kano ka jingsngewthuh bakla. “Uno uno u samla pule na kano kano ka jaid u lah ban wan ban pynpaw ia ki jingeh jongu ne jongka”,u la ong.
U Bah Khyriem u la ong ba ka seng ka la hap ban tuklar ia kane ka kam hadien ba la mih ka jingiakajia hapdeng ki samla pule jong ki ar tylli ki tnad ha ka NEHU.
Ki kynhun ki samla pule bapher bapher ha kane ka skulbah ki la rai ruh ban dawa ban buh CCTV cameras ha baroh kawei ka phyllaw ka NEHU.
Ha kajuh ka por, ki nongialam jong ka NEHUSU ki la pynthikna ia ki samla pule na baroh kiwei ki jylla ban nym don kano kano ka jingtieng namar ba ia ka kynrum kynram la dep pynbeit. Ka ong ba ym dei ban pynher ia ka khubor pyniapher jaitbynriew hynrei dei ban iasah lang da ka jingsngew tynnad bad ha ka jingsuk. La ujor ejahar ruh halor ka jingjia kaba la mih hynnin ka sngi.