Pynskhem ka CEC HSPDP ia u bah Ardent, mynta ka rai ka ARPA

Shillong,1 Nailur:
Ka Central Executive Committee ( CEC) ka HSPDP kaba la long myn ta ka sngi ha ing u bah Hopingstone Lyngdoh, President rangbah katei ka seng ka la rai ban pyn skhem ia u bah Ardent M Basaiawmoit kum u nong ialam jong katei ka seng kaba don ia ka bor ban bat ia ka kam CEM ha KHA DC hapoh ka kynhun jong ka ARPA. Haba kren sha ki nongthohkhubor, u Secretary ka CEC u bah Witting Mawsor u la iathuh ba ha katei ka jingialang la wan ban ia shim bynta da baroh ki MLA bad MDC jong ka seng HSPDP ryngkat ki riew rangbah bad ki khraw pyrkhat katei ka seng.
“Ha ka jingialang ngi la rai ban pynskhem ia u bah Ardent M Basaiawmot kum u nongialam katei ka seng hapoh District Council” ong u bah Witting haba kren sha ki nongthohkhubor, hynrei utei u nongialam ka HSPDP u la ong ba haduh mynta ka HSPDP kam pat don da kawei pat ka rai, hynrei kan dang hap ban peit kumno ka jingialang ka ARPA ka ban long lashai ka sngi kan iaid.
Ka jingialang ka ARPA kan long lashai ka sngi ka 2 tarik u nailur ha ka por 4 baje janmiet, bad ha katei ka jingialang yn shim ia ka rai la yn pynneh ia u bah Ardent kum u CEM ne hap ba pynkylla noh, kumba la dawa ka UDP.