“Kaba jia mynshwa, ka jia mynta”

AIS Suja

Kaba jia mynshwa, ka jia mynta. Dei na kata ka daw ong ka ktien u Blei – “Kata kaba la lah long,long kata kaban salong…. Te ymdon ei ei kaba thymmai hapoh ka sngi. Don eiei kaba ki briew ki ong, ha khmih kane ka long kaba thymmai? Kalah long lypa kein ha ki rta ki ba la long shuwa ia ngi”. Eklesiastis 1: 9-10.

Kane ka jingong ka la jia mynshwa ha Israel hyndai. “Kin iap da ka jingiap kaba shitom, yn ym iam briew iaki, lymne yn ym tep iaki; kin long kum ka kynsha hakor ka khmat ka khyndew, yn bam duh ia ki daka wait lam bad ka nemsniew, ki met iap jong ki kin long jingbam ia ki sim ka suin bad ia ki mrad khlaw ka khyndew. Wat leit bsut sha ka ing ba ki iam sngwsih, lymne wat leit ban iam briew lymne wat ud isynei iaki: naba nga la shimnoh ialaka jingsuk na kine ki briew ong u Trai. Kiba khraw kiba rit kin iapha kane ka Ri: yn ym tep ia ki lymne ki briew kin ym iam briew ia ki. Lymne ki briew kin ym kdiah kpu na bynta jongki ha kaba iam briew ban pyntngen ia ki namar kiba iap: lymne kin ym aidih ia ki naka ne ka khuri ka jingtngen namar u kpa jongki ne namar ka kmie jongki”. Jeremaiah 16:5-7.
Haba ngi iohi ia kine ki jingjia naka bynta ki Israel, ka pynphai ia ki jingmut jongngi halor kane ka khlam Corona virus mynta bad kala long ka jingsympat kaba shisha kumba la jia ia ki khun Israel hyndai. Aiu ba lajia mynta ha Italy, Spain, US, China bad ha kylleng ka pyrthei bad ha ngi, ngi iohi kumba u Blei u da sympat shisha ia ki Ri bad ki jaid bynriew ka pyrthei kumba u la lah leh ha ki Israel hyndai.

Ymdon shuh ki nongtep, ki nong iam lane kiba wan pyntngen, lane kiban iarap, la shu ieh ia ki met iap shato. Kala long ka jingsympat ba shyrkhei ka jingjia kaba sngewsih shikatdei eh.

Haba ngi phai sha ka ktien u Blei kumne, ngi iohi kaei kaba jia mynta kamdei shuh kaei kaei kaba thymmai, hynrei kaba la ju jia ha ki briew jong u ki Israel hyndai haba kim kohnguh bad pyndem ha kamon u Blei, U Blei u la bitar, kumjuh haka pyrthei kaba mynta.
Ngi kynmaw ruh ha kapor ka jingbitar u Blei ia ki bynriew hyndai haba u angel jingiap u her ha suin u iohi ia ki shawkad bala tah da ka snam, ula iaid lait ia kata ka ing hynrei ki bymdon ki hap ban mad ia ka jingiap. Dei iakane ka juh ba u Blei u khot ia ki paid lang jong u u ong- Ale ko paidlang jong nga, to bsut hala ki pulit, khang la ki jingkhang baroh sawdong; buhrieh ialade shipor haduh ban dawai ka jingkhih bitar namar u Trai u lamih ban pynshitom ia ki jingleh bymhok jong ki. Isaiah 26:20-21.
Kane kajuh ka jia mynta ba ha kylleng ka pyrthei ki briew ki hap ban shong khop hapoh ing hapdeng ki Lockdown ha ki Ri ka pyrthei baroh kawei ban buhrieh ialade shipor hapoh kapor jong kane ka jingkhih bitar lyngba kane ka khlam (corona virus).
Hapoh kine ki por, kadonkam ia uwei pa kawei ban puson ban iit ialade, ban phai sha u Blei ban duwai ban kylla bamut halor ki jinglong bymman ka dohnud, khnang ba u Blei un pyllait noh ia kane ka jingkhih bitar lyngba kane ka khlam ba mynta, hakaba kala long shisha ka jingshyrkhei ia ki mynsiem briew ha ka kylleng ka pyrthei.
Kaei kaba u Blei u kwah? U kwah ba hapdeng kum kane ka por ki briew kin phai sha u kin wad ia u dalaka dohnud baroh dakaba duwai bad kyrpad jur, namar tang ma u uba lah ban pyllait ia u briew na kane ka sohsat ka jingim.
Na kata kadaw u ong- “Ladaki briew jongnga, ia kiba la khot da ka kyrteng jong nga , kin pynrit ialade, kin duwai, kin wad ia ka khmat jong nga, kin phai na ki lynti bymman jong ki, te ngan sngew na bneng, ngan map ia ki pop jong ki- Ngan pynkhiah ia ka Ri jong ki”.2 khronikl 7:14.
Kumta kaba jia mynshwa, ka jia mynta dei namar ba u Blei u wan jngoh ia ka pyrthei haka jingbitar jongu namar bun ki briew ki la klet ia u Blei ha kane ka pateng. Hynrei lada ki briew kin duwai, U Blei un sngew na bneng kein bad un map ia ki pop ka pyrthei.