KA BOR BA PYNSANGEH IA KA KHLAM

Rev.B.P.Pohsngap

Ka history ka iathuh ia ngi na kaba pule ia ka ktien U Blei ia ka khlam hyndai ha ka por ki khun Israel. Ki jingpang ba bun jait kiba don ha ka pyrthei, la ki long kiba khraw katno katno ruh, kim ia ryngkat ei ei bad kane ka jingpang mynta ka covid-19. Ha ki por hyndai te la ki jia katno katno ym da tip hynrei mynta te ba la rit ka pyrthei ha ka jingstad ka juk mynta, tang shu jia la ia tip lut ne iohi lut.

Haba la sngap ia ka khubor, don ki Ri ha ka pyrthei kiba la dap lut sa ki lum jingtep, la sngew synei bad sngew shyrkhei shisha shisha. Ka miet 13th bad ka sngi 14th mynta ka taiew te la ka long kaba sngew ngiew shisha shisha, don ki bym iohthiah shuh baroh shimiet bad kiba kyiuh ne sngewtieng ia kane ka jingbna ba la wan poi une u khniang jingpang hangne ha jylla jong ngi. To ngin ia peit bad puson ia kine ki jingjia ba la ju jia long, Katkum ka ktien U Blei .

1. Balei ka khlam ka wan :- ki khun Israel kiba U Blei U la ieit kyrpang eh, U la pyllait na Ri Ijipt, hynrei ki klet ia U Blei ba im ba donbor baroh, ynda ki la im khleh bad ki nong Moab, ki la “KLIM” bad ki khun kynthei Moab”, ym tang katta, ki la ia knia bad ki bleithaw, bad ki la dem ha ki, bad ki la pyniasoh ialade bad u Baalpeor; te ka jingbitar U Trai ka la meh lep pyrshah ia ki Israel” Jingk 25:1-3. Na kine ki pop ba ki la leh, U Blei U la bitar bad ai ha ki ia kane ka jingiapthem (plague) bad “ki la iap arphewsaw hajar na ki khun Israel” Dk. 9. U Blei ba im ba don bor te lada ki jait bynriew ka pyrthei satlak, ki la im da ka lynti ka pop kumba la leh ki khun Israel te ka jingbitar na U kan wan beit khlem artatien. Haba peit ia ki jingjia kylleng ka pyrthei te ka pop tang ban ia kren ruh la sngewjli palat, kat ban ia shongkurim kynthei para kynthei shynrang para shynrang, ym sngew lah mutdur shuh. Ka Mane bleithaw ruh kaba la khraw palat. Kine ki pop ki pynsad ia ka khmat U Trai kat haduh ba la bitar shla bad ai ka jingpynshitom ia ka pyrthei baroh kawei. Ha kane ka jingjia kaba la jia ia ki Israel bad U Blei da kaba ki la phai khmat sha U Blei “ Te kumta la pynsangeh ia ka jingiapthem (plague) na ki Israel”. Jingk 25:8. Haba ngi peit ia ki sawdong sawkun jong kane ka juk jong ngi mynta, ka pop ka la nang jyllei ha ka jingshisha ka jylla jong ngi la bun bah ki Khristan, imat la bun ki Khristan tang da ka nam, hynrei ki kam te la paw ki kam bymman. Ka jingamane bleithaw ruh ka al nangkhraw, bad bun kiba la byrngia ha kiei kiei kat haduh ba la leh sting ia ka jingshakri ia U Blei ba im ba donbor. Dang ha kane ka taiew la don ba phone bad kylli ia nga Pastor, ka long ne em ba ngan leit phah khan? Nga la kylli balei phin leh kumta? , I la iathuh ba dap tang ka jingkhuslai ngam ju iohthiah bha bad ba la don ba ai jingmut ban shu leit phah khan ban tip balei ka long kumta. Nga la ong ia I ba ka pop kaba U Blei U sngewsih eh, ka dei ka mane bleithaw, ba lada phi leh kumta phin nang jynjar shuh shuh hadien. Nga ngeit in nym leit phah khan. Kane ka long ka jingpynkynmaw lang ia baroh, to ngin tip ba bun kiei kiei na kaba ngi leh hi, U Blei U bitar bad U ai ka jingpynshitom.
2. Ka bor ba pynsangeh ia ka khlam :- Lada don kano kano ka ban ai jingkmen, haba don ki jingjia kum ka khlam, tang shu hiar ruh ka la pynkmen, hynrei lada la bna lei lei ba ka la sangeh, ym don ba lah ban batai ka jingkmen kan wan. Ha ka 13,14th tang ba sdang ka covid-19, ban poi ha shilling ruh don ki bym iohthiah shuh baroh shimiet ki sheptieng bad khuslai. Ha ka por ki khun Israel mynba ki ia shong ha “Shittim”, haba la khraw bad jyllei ka pop ba ki Israel ki la ia leh, kiwei pat ki khun Israel kiba dang kynmaw Blei ryngkat U Moses, “ki la ia iam ha khmat ka Tebernakl ka Jingiaseng, la wan uwei u Israel hi ba wallam ia ka kynthei Midian ha khmat u paidbah ka Jingiaseng, bad u khun u Aaron Lyngdoh, U la iohi ia kata, U la mih joit napdeng uta u paidlang bad u la shim ia u sum ha la ka kti, bad u la bud dien ia uta u briew uba kynja Israel hapoh ka ing jain bad u la sum Lyngba ia ki baroh arngut ha ka juh ka por”, Te kumta la pynsangeh ia ka jingiapthem na ki khun Israel Jingk 25:6-8. Kane ka la pynsngewbha ia U Blei haba ki la pynduh ia kaba sniew napdeng jong ki. Kane ka dak ban iohi ba U Blei ynda haba U la iohi ba ki briew ki phai khmat da kaba kylla kabamut na ki jingsniew baroh, U sngewsynei, U sngewlem bad da ka bor jong U tang shi kyntien ka jingpang iapthem ka la duh noh hi.

Paralok parajor baroh, to ngin pyrkhat marwei marwei, U Blei U la iohi lut, U la tip lut, wat ia u niuhkhlieh jong ngi baroh U tip lut, katno tam kat ka mynsiem ba kordor jong ngi lei lei, U tip ban sumar ia ngi, to ngin shaniah ha U, dem duwai, pan map ia ki pop baroh, ma U hi Un pynsangeh ia kane ka covid-19 ha ka Ri jong ngi.
AMEN…………….