KA BUROM:Balei ban burom iwei ia iwei, ka long kaba donkam ha ka jingim?

[ba bteng] Ban ai jingshakri :— Ka jing im ha pyrthei ka iaid beit ban ai jingshakri ia kiwei. Haka jingshisha ka kam jong ngi, ka thong jongngi bad ki jingtrei jingngi ka tawiar sawdong iaki jingthrang jingngi ban shakri ia kiwei. Ban shakri ka pyni ba ngi phikir iaki bad ka jingphikir ka pyni ba ngi burom iaki. Kynmaw baka jingshakri hok iakiwei kadei ka atiar ba hakhmat eh ban don burom.

Ai jingiaroh:— Kawei naki jingwadbniah bala thoh da u Sir William James ka ong iakaba dei ba ki briew kiba leh ei ei kaba bha ki ap khmih lynti ban don ba ai khublei ne iaroh iaki, te ban ai jingiaroh kadei ka lynti kaba biangtam ban pynshisha ba ki leh iaka badei. Haba kiwei ki leh ei ei kiba ai jingmyntoi iaphi lane ban ong ei ei kaba lah ban iarap iaphi, phi dei ban ai khublei ne pyrto iaki jinglehbha jongki, kane kan wanrah burom shi katdei eh iaphi bad iakiwei ruh de. Teng teng haba phi leh bha iakiwei bad kim patiaw ne niewkor ban ai khublei iaphi, kane kam pher, ka shu dei tang ka jingsngew kaba don hangi, kam da donkam eh ban ioh jingiaroh man ka por hynrei kham bunsien haba lehbha ia kiwei, kiwei ruh ki dei ban sngewthuh ban ai khublei ka donkam khnang ban burom iwei ia iwei pat.
Balei ban burom kalong kaba donkam haka jingim?

1. Ban burom kan dei ka jubab kaba biangtam haka imlang sahlang:— Kawei na ki jinglong kyrpang jongka imlang sahlang kalong ban pyni ne ai burom iaki para nongshong shnong. Kynmaw ba la kidei kiba ha iing ha sem, ki nongshong shnong ha sor ne ha nongkyndong, haka jylla bad haka pyrthei hi baroh kawei, kidei hok ban ioh burom.Ka Universal Declaration of Human Rights kaba la seng daka United Nations General Assembly na Paris ha u snem 1948, kala ong baka jingthmu jongka ka long ban pynioh ia ka hok bad ka burom jong man la u wei pa uwei u briew u ba dei hok ban ioh. Ban ai burom naka bynta ka jingim briew bad naka bynta ki briew kadei ka bynta kaba donkam eh haka imlang sahlang bad haka pyrthei baroh kawei.
2. Khlem ka burom ngi duh mynsiem:–– Ka burom kadei ka nongrim jong ka jinglong haki briew, hynrei i kumba kane kala sdang duh noh namar ki briew kim nang ia kaban burom iwei ia iwei pat.
   U kpa jong ki psychiatrist u Sir William James u ong “ka jingjylliew jongka nongrim haka jingim briew kadei beit ban ioh jingiaroh”. Kito ki bymshah iaroh kim sngew don burom ialade bad kane ka pynduh jingkyrmen iaki. Ka jingiaid shaphrang jongka jingpyrshang na ka bynta ka hok longbriew manbriew kadei ka jingpyrshang ban jop iaka burom na kiwei. Ngi shim iakane ka jingshisha kum ka jing sakhi dalade. Ka jingburom na ka bynta kiwei kala nangduna katba nangiaid ki sngi naka jingsumar bad ai jingiada iaka hok. Kynmaw ba khlem ka burom kine ki jingleh hok kin jah bad duh noh bad lada kalong kumta ka burom ruh kan duh noh bad hakaba kut kine baroh ar kin jah syndon.
   KABA KUT:—– Te ngi la iohi bad sngewthuh ka burom ka long kumno, ngi la sngewthuh kumno ban ai burom ia kiwei haka lynti kaba dei bad ngi lah iohi ruh balei ka burom ka long kaba kongsan. Hynrei ngidei ruh ban sngewthuh ba ngi dei ban ai burom man ka khyllipmat haba don ba leh bha iaphi. Baroh kiba kwah burom, namar kata phi dei ban nang shuwa kumno ban ai burom iakiwei te kiwei ruh kin leh kumjuh bad lada ka long kumta baroh ki briew kin ioh burom bad kin ai burom kylliang ia kiwei bad lada ka pyrthei hi baroh kawei kan bud iakine ki nuksa, kan don ka jingkylla ha man la ki jingmut jingpyrkhat bad haka jingim briew ruh de.