Sa 182 ngut kiba ioh jingpang coronavirus ha Bangladesh

Kiba ioh jingpang coronavirus, hynnin ka sngi ha Bangladesh, ki la kiew da 182 ngut bad baroh kiba ioh ia katei ka jingpang, ki la poi sha ka 803 ngut. Ki don ruh sa 5ngut kiwei pat kiba iap bad baroh kiba iap, ki la poi sha ka 39 ngut, ong U Zahid Maleque, myntri ka koit ka khiah ka sorkar Bangladesh.

Ka nongbah Dhaka, ka dei kaba shah ktah shi katdei na kane ka jingpang, ha kaba ki don 313 ngut kiba ioh ia katei ka jingpang bad nangta sa 75ngut kiba don ha ki jaka ba marjan bad ki don kiwei ki bynta jong ka District Dhaka, kiba don 22ngut kiba ioh ia katei ka jingpang.

Ka nongbah Narayanganj, kaba dei ka jaka trei karkhana kaba khlain bha, ka don 107 ngut ki nongpang, naduh ba ka sdang ha ka 8tarik Lber 2020, ha kaba uwei u doktor, ula ioh pang ha katei ka nongbah.

Ka jingpur katei ka jingpang, ka la poi sha ki 38 tylli ki District, na baroh ki 64 tylli ki District jong ka Bangladesh bad katei ka dei ha ki 35 sngi, naduh ba ka la sdang katei ka jingpang ha katei ka Ri.