Da ka jingialang kaba kyrpang pynlong u MLA ka Jirang

Nongpoh:Ki Nongmihkhmat ka Jirang Constituency kiba kynthup ia u Bah Sosthenes Sohtun, MLA bad u Bah Victor Ranee, MDC, hynnin ka sngi ki la hiar sha Jirang, na ka bynta ba pynlong ia ka jingialang kaba kyrpang bad ki briew jong ka Jirang C&RD Block, kata hadien ba ki lal iohi ba ki briew kiba trei hapoh katei ak C&RD Block, ki la trei tyngeh shisha, na ka bynta ban tehlakam ia ka jingsaphriang jong ki khniang jingpang COVID-19 bad ruh kiba la leh shitom, na ka bynta ka bha ka miat jong ki paidbah hapoh jong katei ka thain.

Haba shimbynta ha katei ka jingialang, u Bah Sosthenes Sohtun, MLA ka Jirang, u la pynpaw ia ka jingkmen ban iohi ba ki nongtrei jong katei ka Block, ki la trei shitom shisha bad aiti ialade na ka bynta, ban iada ia u COVOD-19 bad ruh ban pynbiang ia ki jingeh, kaba la kynduh da ki paidbah jong ki shnong kiba hap hapoh ka Jirang Constituency.

Ha kajuh ruh ka por, ha katei ka jingialang, la ioh ruh ia ka jingkren na u BDO ka Jirang Block, u la ai ka jingkhublei kaba kyrpang ia ki nongtrei ka Jirang C&RD Block, namar ka jingshimkhia ka jongki ban iarap ia ki paidbah ha kaba kum kane ka por, kata hadien ba ki la shimkhia ha kaba tehlakam ia u COVID-19.
Na ka liang ki nongmihkhmat ka Jirang, naduh u MLA bad MDC, ki la ai ka jingiaroh kaba khraw sha kitei ki nongtrei jong ka Jirang C&RD Block, namar ka jingtrei shitom ka jongki haba iadei bad ka bha ka miat jong u paidbah uba sah ha katei ka thain.