Sting ka jing pahara ia ki khappud

Bah Monarch Shabong

Na ki khubor kiba paw, ngi iohi, ba ha kat kane ka jing khang shnong kaba la pynlong kylleng ka India, hynrei, ki dang don bun bah pleng ki jingdkoh bad halor kane ka phang, ka jing kitkhlieh, ka dei ha ki pulit, lada dei sha khappud bad ka Assam bad nangta sha ki BSF, lada dei sha khappud bad ka Bangladesh.

Khyndiat sngi mynshwa, ka KSU, ka la ioh bat ia 20 ngut ki bar Jylla ha ka shnong Disong, kaba ha Shella bad hadien kata, sa ka HYC, ka ioh bat ia kiwei pat ki bar Jylla, kiba iaid kjat sha Upper Shillong bad dang hynnin ka sngi, sa ka dorbar Shnong Umsaitsning, Lad Mawrong, ka la ioh bat ia ka trok kit jhur bad kitei ki jing shisha, ki pyni ba haduh katno ka synjor ka leit ka wan sha ki sawdong pud jong ka Jylla.

Kitei ki long khyndiat ki jing shisha, hynrei ngim lah ban tip, ia kiwei pat kiba lah ban iaid sahuh lyngba ka khyrdop na Byrnihat, nangta na Ratacherra bad nangta na ki khappud bad ka Bangladesh, kum ka Balat, Dawki bad kiwei bad wat ia ki nongpang, kiba ju wan khah khah sha NEIGHRIMS. Haba iohi ia kane ka jing lehsting ia ka pakhang shnong, da kaba ailad ia ki briew kiba nabar, ba kin rung kin mih katba mon, ka la dei ba ngin peit bniah bha, ia ka jing jubor ka jingpang Covid 19, ha ki ri sepngi bad ka daw, ka long namar ba ka synshar paidbah, ka khlain palat sha kitei ki ri bad u paidbah, um salia ia ki kyndon khang shnong ka sorkar, hynrei, u ia leit kai katba u sngew mon bad ka dei na katei ka jing saitlah lane ka jing laitlan, kaba la pynmih ia ka jingiap kaba da ki phew hajar ngut sha kitei ki ri khraw bor.

Hangne ngim tip, naei ka wan ka jing synjor, wat la ka jing peit khmat jong uba bun, ka dei halor ka jing leh sting ki bor pulit, hynrei ha kum kane ka por, ka la dei ia ka sorkar Jylla, ba kan tynrong da ka bor kaba khlain, ba ki VDP, ki Rangbah Shnong, ki Sengbhalang lane ki Seng Kynthei, kin dei ban trei ia la ka jong ka kam, khlem salia, wat lada ki dei ban ia pyni bor bad ki pulit ne ki BSF ruh ha ki khep ki khep.

To ngin peit ruh ia ka nuksa jong ka China, namar ba lada nalade, ka la lah ban pynduh ia ka jingpang corona, hynrei ha kine ki sngi, ka la sdang pur biang bad ka daw, ka long ba ki wan rah kito kiba wan na shabar Ri.