Ki khubor lyngkot hadien ba U Jisu U la mihpat

Rev. B.P Pohsngap

Ha ka por kaba ia syriem kum ha ka jingiap bad por jingmihpat hi U Jisu ba ha kato ka por, ka por sheptieng, ka por sngewma, ia kaei kaba la jia baroh. Ngi ruh mynta ngi don ha ka por sngew sheptieng sngewma ia kata ka jingpang corona virus – covid19, kaba ka pyrthei satlak ka la khynniuh bad ma ngi ruh kum ka jylla hangne ngi la sngew sheptieng sngewtriem, bad da kaba “Kohnguh” ia ka ktien jingpynbeit ki nongsynshar, ngi don ka jingsngewshngain, ha kaba sngew ba ngi rieh ha ki ksangti U Blei ba don bor baroh. Wat ha kum kane ka por ruh, ngi la sngewkmen ba ka jingrhem mynsiem ban ioh mane, Iaroh ia U Nongpynim U ba la iap., U ba mih pat, ba la pyndep ia ki jingiathuhlypa baroh, U ba ha U ngi kyrmen ia ka lawei jong ka jingim bymjukut ruh. Tang katto katne ki rukom pynpaw U Jisu.

1. U pynpaw ba U ieit shisha ia ki nongpop : U Jisu hadien ba U la mih pat, “ U la pynpaw nyngkong ha ka Mary ka Nongmagdala” Mar 16:9- kaba la long ka nongpop ba la shah ban bein ha ki hynniew ki ksuid. Hapdeng kine kiba ia kyrmen lang ia ka jingmihpat ruh, ynda ka Mary ka la iathuh ba U la mih na ka jingtep, “ don ki bym ngeit”. Ah nga mutdur bad pyrkhat, ba haba ki ia bud, hynrei kim ngeit pat ba U la mihpat. Ngi donkam bha ban pyrkhat ialade marwei marwei , ioh ngi jia long tang ki nong synran lang, ia kiba ngeit shisha, hynrei ha lade pat, ngi khanglad noh ia ka jingngeit ba shisha ba U la mih pat.
2. U Pynpaw ha ki kynthei kiba dang iaid lynti, : Da kaba sheptieng bad da ka jingkmen kaba khraw “ U Jisu U la wan tan ia ki bad U la ong , khublei, ki la iohi ia U Jisu, ki la ia kren bad U, ki la iohi ia U Jisu, ki la iakren bad U, ki la mane dem ia U, bad U Jisu U la ong ha ki “ Wat sheptieng” Matt 28:8-10. U phah ia kine ki kynthei ban leit sha Galilaia, ba hangta ruh kin iohi ia U.
3. U Pynpaw ha ki arngut ki nongiaid lynti sha Emmaus : ka long kaba phyla ba ha ki kynthei , U pynpaw beit ha ki ba U long U Jisu U Trai hi, hynrei ha ki nongiaid lynti, u pynthame ia ki ba kim shym la ithuh ia U, ki dang ong pynban ia U “ Long tang mame u nongwei ha Jerusalem bad mem tip ia kiei kiei ruh kiba la jia ha ka, ha kine ki sngi. Luk 24:18. U Kleopas bad u paralok jong u ki don ha kane ka por ba la bna ia ka jingmihpat U Jisu hynrei kim da suidniew eh kat ban sngap bha ia ka khubor ha Jerusalem kaei ka jingjia kaba khraw ka bym ju ioh sngew mynno mynno ba u briew un mihpat na jingtep. U Jisu namar U kwah ba kin tip ba dei U Jisu. Ha ba la janmiet U pynpaw kum U ban dang bteng ka jingleit kham jngai, kine ki arngut, la kim ithuh ia U, ka mynsiem briew ha ki ka don, ban khot sahmiet ia U ryngkat bad ki, namar ba ka la noh ka sngi. “ ka la jia haba U dang shong bam bad ki , haba U la shim ia u kpu, U la kyrkhu, U la kdiah, bad U la sam ia ki” . Luk 24:30. Ynda U Jisu U kyrkhu , U Kdiah kpu bad U sam ha ki, ki kyndit thred, ki kynmaw ba U Jisu “ U kdiah kpu ha ka por ba U bsa ia ki san hajar ki paitbah, khlem artatien, kine ki arngut, ki la ioh bam kpu kambah hapdeng ki “sanhajar ki paitbah ba shong ha u phlang”. Hamar “ ba ki ithuh ia U, U la jah noh jar na ki”. Ha kata hi ka miet, “ te ki la ieng joit ha kata ka juh ka por bad ki la leit phai pat sha Jerusalem, bad ki la iashem ia ki khadwei ngut, bad kita kiba ia don lem bad ki, ba ki iaseng lang”. Ki la ia kmenlang, bad kine ki arngut ki la iathuh ba “ U la kdiah kpu ia ki”.
4. U pynpaw khatduh ha ki khadwei ngut ki synran : ki synran U Jisu , ki tharai ba ka dei ka rngai haba kyndit “ U paw bad U ieng hapdeng jong ki” bad U la ong ha ki, LONG KA JINGSUK IA PHI! Ka dei shisha ba kum ki briew kin ong ka rngai, namar haba U rung hapdeng jong ki, Um tied jingkhang ia ka ing, U shu ieng hapdeng jong ki. U la ong ia ki, “Balei phi ia sheptieng ?” “namar balei ba ki jingmut artatien ki ia mih ha ki dohnud jong phi?, U la pynpaw da kaba shai ha ki khnang ba kin nym artatien shuh, “To khmih ia ki kti jong nga, bad ki kjat jong nga, ba dei ma nga hi; to tba ia nga, to khmih ruh, naba ka mynsiem kam don ka doh bad ka shyieng, kumba phi iohi ia nga ba nga don ”. Haduh kane ka por dang don ka jingbymngeit ha ki; U Jisu U iohi ha ki ia kata, U la pan jingbam na ki bad ki la ong, “ don tang shi dkhot ka dohkha ba la thang bad na ka rewngap, Te haba U la shim U la bam ha khmat jong ki”. Kane ka dei ka jingbam kaba khatduh eh ba U Jisu ha shuwa ba Un kiew sha bneng sha U Kpa. Ha shuwa ba un ia khlad bad ki khadwei ngut , U la kren khatduh bad ki , “ U la ong ruh ha ki , kine ki long kita ki ktien ia kiba nga la kren ha phi, mynba nga dang don lem bad phi, ba ka dei ban pyndep ia kiei kiei baroh, ia kiba la thoh ha ka hukum U Moses bad ha ki nongiathuhlypa ha ki Salm de, shaphang jong nga”. Haduh kane ka por, “ la plié wang ia ka jingmut jong ki, ia ka ban shemphang ia ki jingthoh ba ka la dei ia U Khrist ban shah bad ban mihpat de na ki nongiap ha kaba lai ka sngi , bad ha ka kyrteng jong U, yn ialap ia ka jingkylla kabamut bad ia ka map ia ki pop hapdeng ki jait bynriew baroh da kaba sdang na Jerusalem: “ Phi ruh phi long ki sakhi ia kine kiei kiei”. Ha khmih ruh nga phah ia kata kaba la kular U Kpa jong nga, hynrei phi to nang shong ha nongbah Jerusalem, tad ynda yn pynkup ia phi da ka bor na jrong”. Luk 24:36-49. “ Kumta U la ialam noh shabar ia ki haduh Bethania ; haba U la rah ia la ka kti ruh, U la kyrkhu ia ki, bad U la khlad noh na ki, ba la rah ruh ia U sha bneng”. “ Te haba ki la lah ia mane ia U, ki la leit phai pat sha Jerusalem bad ka jingkmen kaba khraw”.

Paralok para Khristan baroh, ngi la leh kmen Good Friday bad Easter Sunday, ym tang mynta, hynrei man kawei pa kawei ka snem, to ngin nym klet ia kitei ki ktien ba U Trai Jisu U la kwah bad ban jur, “ ba yn ialap ia ka jingkylla kabamut, ia kaban map ia ki pop hapdeng ki jait bynriew baroh” ba ngin long ki sakhi ia ka bor ka jingiap jong U bad ka bor ka jingmihpat jong U. Kumba U la kyrkhu ia ki synran, Un kyrkhu ia ngi ruh haba ngi Kohnguh ban leh ia ka mon jong U baroh . AMEN……………..