Snoh kti lang ka SKJCLF, ha ka prokram ka Meghalaya ka duwai

Shillong: Ki dkhot jong ka Shillong Khasi Jaintia Church Leaders Forum (SKJCLF) ki iasnoh lang kawei bad ki ba bun ki nongshongshnong ha ka Jylla bad kiwei de, ha ka program ka Meghalaya ka Duwai (Meghalaya Prays) ba la khot bad lamkhmat da u Myntri Rangbah badonburom U Conrad K Sangma ha ka janmiet jong ka Sngi Jingmihpat U Khrist (Easter Sunday) 12tarik u Iaiong 2020.

Kane ka long ka jingkhot ban iasnoh kti lang baroh ha ka jingialeh pyrshah ia ka khlam COVID19. Shibnai kynthih mynshuwa, ka Forum ka la pynlong ia ka program Jingduwai na ka bynta ka Meghalaya (Prayer for Meghalaya) ha ka 12tarik u Lber 2020, ha kaba u Myntri Rangbah, ki paralok jong u lem bad kiwei de ki nongialam ki la iashimbynta.

Ki jingduwai bad jingrwai lang ha ka ktien Phareng, Khasi bad Garo – ia ki jingrwai “Ka Jingaiei Baphylla”, “Me Long Bakhraw”, bad “Namar b’U im nga don ka Jingkyrmen” ka la tehsong lang ia baroh ki nongiashimbynta kylleng ka Jylla bad shabar ruh, ha u kynjri jong ka jingialong kawei.

Wat hapdeng ka jingdonkam ban shong beit ha iing (lockdown) ha ka ri baroh kawei, to ai ba ka jingpynthymmai ia ka jingim kaba ka Sngi Jingmihpat U Khrist (Easter) ka wanrah, kan plie noh wang na ka bynta jong ngi baroh ia ki jingkyrkhu jong ka jingsdang kaba thymmai ha ka jingkyrmen, ka bor iaishah, ka jingjemnud, ka jingsuk, bad ka jingpynkhiah ha ka pyrthei. Ka Forum ka kyntu ruh ia baroh ban bteng ha ki jingduwai na ka bynta ka Sorkar bad ki tnat treikam jong ka baroh hapdeng kane ka por jong ki jingeh bad jingialeh, bad ka ai khublei Sngi Jingmihpat U Khrist ia baroh.“U Trai U la mihpat. U la mihpat da shisha!”